Тәуелсіз еліміздің жаңа отбасыларының басты күші – бірлік пен ортақ рух. Бұл бүгінгі қоғамда өз орнын тапқан мыңдаған жас отбасылардың өмірінен айқын көрінеді. Солардың бірі – Қонаев қаласының тұрғыны, ұлты неміс болғанымен, жүрегі қазақ деп соғатын Ержан Гайвель.
Ержанның атасы ел басына күн туған ашаршылық жылдары Қазақстанға қоныс аударған. Сол кезеңде жаңа жер, жаңа тағдыр, жаңа үміт тапқан ұрпақтың жалғасы – бүгінгі Ержан.
«Мен еліміздің шығысы – Жидебайда дүниеге келдім. Қазақ балаларымен тай-құлындай ойнап өстік. Ата-әжелеріміздің өмірі жайлы толық біле алмасақ та, өз Отанымызды – Қазақстанды жүрегімізге жақын тұттық. Тілім – қазақ тілі. Орысша акцентпен сөйлеймін», – дейді Ержан Гайвель.
Жастық шағында әскери борышын өтеуге Қапшағайға (қазіргі Қонаевқа) келген ол өмірлік жары Айгерімді жолықтырып, бүгінде төрт бала тәрбиелеп отырған бақытты әке. Отбасыдағы балалардың бәріне қазақша есім беріп, ұлттық рухты ұрпақ жадында сақтауды мақсат етеді.
«Қиын жылдары бізге қолдау көрсеткен жандар аз болған жоқ. Әсіресе, Серік деген ағамыздың үйін паналаған кездерімізді ешқашан ұмытпаймыз. Қазір, Аллаға шүкір, барлығы түзелді. Көпбалалы ата-ана атандық. Бізді демеген адамдарға ризамыз», – дейді ол.
Оның айтуынша, Қонаев қаласының басты ерекшелігі – әр этнос өкілінің бір-бірімен тату-тәтті ғұмыр кешуі.
«Қалада алдағы күндері кәріс халқының мерекесі тойланады. Бұдан бөлек, тұрғындар «Масленица», «Пасха», Құрбан айт секілді әртүрлі мейрамдарды бірге атап өтеді. Бұл – бірлігіміздің, татулығымыздың айғағы», – дейді қала тұрғыны.
Тәуелсіз Қазақстанның жаңа ұрпағы – түрлі ұлттан тарағанымен, ортақ мүддесі бір халық.
Ержан секілді азаматтардың өмір жолы еліміздегі ынтымақ пен достықтың ең жарқын дәлелі. Бірлік пен татулық – ел іргесінің беріктігін айғақтайтын басты құндылық. Ал сол құндылықты көздің қарашығындай сақтайтын жаңа буын – тәуелсіздіктің тірегі.
