Sona.kz

Метка: Басты оқиғалар

  • Шамалған стансасында темір жол өткелі жабылды

    Шамалған стансасында темір жол өткелі жабылды

    Алматы облысы Қарасай ауданы Шамалған стансасы маңында 19 наурыздан бастап автокөліктер қозғалысы өзгереді.  Бұл туралы «ҚазАвтоЖол» баспасөз қызметі мәлімдеді.

    «ҚазАвтоЖол» ҰК» АҚ республикалық маңызы бар KAZ01 «Астана-Қарағанды (айналма жол) – Алматы» автожолының «Шамалған стансасының айналма жолының» 2453-2446 шақырым (42-49 шақырым) аралығындағы учаскесінде құрылыс жұмыстарының аяқталуына және қолданысқа берілуіне байланысты жол пайдаланушыларға өзгерістер туралы ескертеді.  19 наурыздан бастап «Қазақстан темір жолы» ҰК» АҚ хаты негізінде Алматы облысы, Қарасай ауданы, Жібек жолы елдімекені арқылы өтетін аталған автожолдың 2448+900 шақырымында (46+100 шақырым) орналасқан теміржол өткелі жабылады. Көлік құралдарының үздіксіз қозғалысын қамтамасыз ету мақсатында барлық қауіпсіздік талаптарына сәйкес келетін жаңа айналма жол ұйымдастырылды», – делінген хабарламада. Яғни, бұл жолға шектеу қойып отырған – «Қазақстан темір жолы» АҚ. «Қазавтожол» тек балама жол ұсынғанын айтты.

    Қазіргі уақытта барлық қажетті жол белгілері мен қозғалысты реттейтін құралдар белгіленген аймаққа орнатылған.

    Sona.kz тілшісі Қарасай ауданы әкімдігіне хабарласып, мән-жайды сұрап көрді. 

    «19 наурыз күні Жібек жолы ауылы Р.Байжарасов көшесінде орналасқан темір жол өткелі толықтай жабылды. «Қазавтожол» АҚ тарапынан бетондар және арнайы жол белгілері қойылып, «Қазақстан темір жол» АҚ темір жол өткелінде торлы қоршау орнатып, демонтаж жұмыстарын жүргізуде», – деп жауап берді.

  • Ерлан Ақкенженов Энергетика министрі болып тағайындалды

    Ерлан Ақкенженов Энергетика министрі болып тағайындалды

    Ерлан Ақкенженов ҚР Энергетика министрлігінің басшысы болып тағайындалды. Тиісті жарлыққа мемлекет басшысы Қасым-Жомарт Тоқаев қол қойды.

    Құжат мәтіні 2025 жылғы 19 наурызда Ақорда сайтында жарияланған.

    «Мемлекет басшысының Жарлығымен Ерлан Құдайбергенұлы Ақкенженов Қазақстан Республикасының Энергетика министрі лауазымына тағайындалды», – деп жазылған ресми ақпаратта.

    Ерлан Ақкенженов 1979 жылы Алматы қаласында дүниеге келген. «Әділет» жоғары құқық мектебін және «Астана» университетін бітірген. Еңбек жолын 2002 жылы жеке меншік ұйымда бас маман болып бастаған.

    2004-2012 жылдары мұнай саласындағы кәсіпорындарда басшылық лауазымдарда болды.

    2012-2016 жылдары KPMG International (Rompetrol) компаниясында бас менеджер, трейдинг жөніндегі аға басқарушы директор болып жұмыс істеді.

    2016 жылдан 2022 жылға дейін коммерциялық құрылымдарда жұмыс істеді.

    2022 жылғы шілде айынан бастап қазіргі уақытқа дейін «ҚазМұнайГаз» ҰК» АҚ мұнай өнімдері маркетингі басқармасының бастығы болып қызмет етті.

    2023 жылғы маусымнан бастап қазіргі уақытқа дейін Қазақстан Республикасы Энергетика вице-министрі қызметін атқарды.

    2023 жылдың 4 сәуірінен бастап ҚР Энергетика министрі қызметін 2025 жылғы 18 наурызда президент жарлығымен жаңа Атом энергиясы агенттігін басқарған Алмасадам Сәтқалиев атқарды.

  • Діни басқарма ЛГБТ-ға қатысты мәлімдеме жасады

    Діни басқарма ЛГБТ-ға қатысты мәлімдеме жасады

    Муфтият жариялаған видеода еліміздің бас имамы Наурызбай қажы Тағанұлы ЛГБТ-ның үклкен күнә әрі ата-баба жолына қайшы келетін жат түсінік екенін айтты.

    «Мұсылмандар діни басқармасы өз тарапынан арнайы пәтуа шығарды және ЛГБТ-ға қатысты мәлімдеме жасады. Бұл әрине біздің ұлттық құндылығымзыға , салт-дәстүрімізге, ата-баба жолына қарсы дүние. Өкіншіке қарай, батыс елдерінде келіп жатқан қазіргі таңда, біздің елімізде де төбе көрсетіп жатқан бұл арсыздықтың алдын алуымыз қажет. Ата салтын берік ұстанған азамат ретінде әрине бұған біз қарсымыз. Өйткені бұл ашық арсыздық дүние, үлкен күнә. Бұның азабы өте үлкен», – Наурызбай қажы Тағанұлы.

  • Алматыда мопедтегі 19 жастағы жігіт жол апатынан мерт болды

    Алматыда мопедтегі 19 жастағы жігіт жол апатынан мерт болды

    Алматыда бетон араластырғыш көлігі мен мопед соқтығысып, салдарынан 19 жастағы жігіт көз жұмды.

    Полиция департаменті ақпаратты растады. Жол апаты кеше, 18 наурыз күні сағат 20:50-де Қарасу шағын ауданында болған. Мопед жүргізушісі қиылысқа шығып кетіп, Howo жүк көлігімен соқтығысқан. Апат салдарынан 19 жастағы мопед жолаушысы мерт болды.

    Полиция қылмыстық іс қозғағанын айтты. Тергеу амалдары жүргізіліп жатыр.

  • Трамп пен Путин қандай келісімге келді?

    Трамп пен Путин қандай келісімге келді?

    18 наурыз, сейсенбі күні, АҚШ президенті Дональд Трамп пен Ресей президенті Владимир Путин телефон арқылы сөйлесті.

    Әңгіме екі жарым сағатқа созылды. Бұл туралы Ақ үй басшысының көмекшісі және аппарат басшысының орынбасары Дэн Скавино хабарлады.

    «Қазіргі уақытта — президент Трамп Овальды кабинетте отырып, Ресей президенті Владимир Путинмен шығыс уақыты бойынша таңғы 10:00-ден (Астана уақытымен 19:00) бастап сөйлесіп жатыр. Қоңырау жақсы өтуде және әлі де жалғасуда», – деп жазды ол Х әлеуметтік желісіндегі парақшасында.

    CNN телеарнасы ресейлік дереккөзге сілтеме жасай отырып, Путин мен Трамптың телефон әңгімесі «өте жақсы» өткенін хабарлады.

    «Әңгімемен таныс ресейлік дереккөз CNN-ге оның «өте жақсы» өткенін айтты», – делінген телеарна жариялаған материалда.

    Ал Трамптың өзі:

    «Біз энергетика мен инфрақұрылым бойынша атысты дереу тоқтату туралы келісімге келдік. Алдағы уақытта атыстың толық тоқтатылуы және Ресей мен Украина арасындағы осы соғыстың аяқталуына қол жеткізу үшін жылдам әрекет ететін боламыз», – деп жазды әлеуметтік желісіндегі парақшасында.

    АҚШ басшысының сөзінше, бұл соғыс ол президент болғанда ешқашан басталмас еді.

    «Бейбіт келісімге қол жеткізудің түрлі аспектілері талқыланды, оның ішінде мыңдаған сарбаздың қаза болуы туралы да айтылды. Путин мен Зеленский бұл соғыстың аяқталғанын қалайды. Бұл процесс қазір жүріп жатыр. Біз адамзат үшін осы жұмысты аяқтаймыз деген үміттеміз», – деді америкалық көшбасшы.

    Ақ үй Трамп пен Путиннің келіссөздеріне қатысты пікір білдірді. Ақпаратқа сәйкес, екі президент те бұл қақтығыстың бейбітшілікпен аяқталуы тиіс екеніне келіскен. Сонымен қатар, Вашингтон мен Мәскеу арасындағы екіжақты қарым-қатынасты жақсарту қажеттілігі де сөз болған.

  • Айтбек Амангелді Қуандық Бишімбаевтың үстінен тағы шағым түсірді

    Айтбек Амангелді Қуандық Бишімбаевтың үстінен тағы шағым түсірді

    Сот кабинетіндегі мәліметке сүйенсек Айтбек Амангелді бұл жолы арызды Жоғарғы сотқа берген.

    Айта кетейік, былтыр тамызда Айтбек Амангелді Қуандық Бишімбаевты сотқа беріп, 1,5 млрд теңге моральдық өтемақы талап еткен болатын.

    Қыркүйекте сот Бишімбаевтан 10 млн теңге өндірді. 27 қарашада Астана қалалық соты апелляциялық инстанцияда бұл шешімді өзгеріссіз қалдырды.

  • Шерзат Болаттың отбасы Айтбек Амангелді бастаған адвокаттардан бас тартты

    Шерзат Болаттың отбасы Айтбек Амангелді бастаған адвокаттардан бас тартты

    Мұны адвокат Саида Тәукелева хабарлады. Ол осы шешімге байланысты Қаржаубай Нұрымовпен ертең кездесетінін жеткізді.

    18 наурызда Айтбек Амангелді баспасөз-конференциясында Шерзаттың әкесі Қаржаубай Нұрымовтың адвокаттардан бас тартқанын айтты.

    Айтбек Амангелді бір күн бұрын Шерзаттың туыстарымен кездескенін айтты. Кездесуде Шерзаттың әжесі Гүлбар және белгісіз бір әйел болған.

    Адвокаттар сот жақындағандықтан, жәбірленушілерді жауап алуға дайындау керек деп шешкен. Дәл сол кезде Қаржаубай Нұрымовтың адвокаттардан бас тартқаны туралы жаңалықты естіген.

    «Осы кездесуден кейін екі сағаттан соң маған Қаржаубай хабарласты. Ол біздің адвокаттардың бәрінен сенімхаттарын қайтарып алатынын айтты. Басқа адвокаттарды таппақшы. Біз бұл әрекетке реакция білдірмедік, себебі Қаржаубайдың мінезін білеміз. Не болатынын көреміз. Кейінгі күндері белгілі болған ақпараттарға қарағанда, іске бес жаңа адвокат кіріседі. Біз үшін негізгі сұрақ – бұдан кейін не болатыны», – деді ол.

    Адвокат осы уақытқа дейін істелген  жұмыстың осылай аяқталғанына реніш білдіріп, бірлесіп жұмыс істеген әріптес адвокаттарына алғыс білдірді. Сонымен қатар 60 томнан тұратын қылмыстық істі оқып шығуға аз уақыт, аз күш кетпегенін де айтты.

    «Қаржаубайдан себебін сұрағанымызда «бұл телефонмен айтыланын әңгіме емес, ертең кездесіп барлығын айтып беремін» деп қысқа қайырды. Қаржаубай 15 тәулік уақытша ұстау изоляторынан шыққан кезде ешкіммен сөйлескісі келмейтінін айтқан болатын. Біз де отбасының жанында болып өз-өзіне келіп алсын деп уақыт берген болатынбыз. 18 қаңтардан кейін Қаржаубайды бүгін көрдік. Қазіргі таңда Қаржаубайдың отбасымен білікті психологтар жұмыс жасап жатыр. Алдағы уақытта бұл істі кім алса да сәттілік тілейміз», – деп жауап берді Айтбек Амангелді.

    Істің сотта қашан қаралатыны әзірге белгісіз. Қазақстан Республикасы Ішкі істер министрінің орынбасары Санжар Әділов 16 жастағы Шерзат Болаттың өліміне қатысты қылмыстық іс жақын күндері сотқа берілетінін хабарлаған болатын.

    Естеріңізге сала кетейік, 2024 жылы 4 қазанда Талғарда 16 жастағы Шерзат Болат кісі қолынан қаза тапты. Өткен жылдың желтоқсан айында оның ағасы Нұрғанат Ғайыпбаевтың денесі бейіт маңынан табылған болатын. Алдын ала болжам бойынша ол өз-өзіне қол жұмсаған.

  • Путин мен Трамптың сөйлесуі екі жақтың бастамасымен өтеді – Песков

    Путин мен Трамптың сөйлесуі екі жақтың бастамасымен өтеді – Песков

    Ресей президентінің баспасөз хатшысы екі ел басшылары әңгімесінің қорытындысы баспасөзге хабарланатынын айтты.

    Владимир Путин мен Дональд Трамптың алдағы әңгімесі екі жақтың да бастамасымен өтеді. Бұл туралы ТАСС агенттігінің сауалына жауап берген Ресей президентінің баспасөз хатшысы Дмитрий Песков хабарлады. Ол екі ел басшылары әңгімесінің нәтижесі туралы баспасөзге хабарланатынын атап өтті.

    – Бұл өзара келісім. Біз қалай болатынын әлі шешкен жоқпыз, бірақ міндетті түрде хабар таратамыз, – деп сендірді ол.

    Песков бұған дейін Путин мен Трамптың сөйлесуі 18 наурызға жоспарланғанын айтқан болатын. Ол әңгімелесу қанша қажет болса, сонша уақытқа созылатынын жеткізген.

  • Астанада ақылы тұрақтар мемлекет бақылауына өтеді

    Астанада ақылы тұрақтар мемлекет бақылауына өтеді

    Әкімнің орынбасары Ерсін Өтебаевтың айтуынша, келісімге қол қойылып, жазға дейін бұл жүйе толық мемлекеттік бақылауға өтеді.

    Қазіргі таңда өткізу процесі жүріп жатыр. Реформа аясында камералар орнату, жаңа басқару жүйесін енгізу және көліктерді эвакуациялау қарастырылған. Бұл өзгерістер әсіресе кептелісі көп аудандарда жүзеге асырылады.

    “Бірінші кезекте халық көп жүретін аймақтар реттеледі. Камералар орнатылып, тұрақ ережелерін бұзған көліктер эвакуацияланады. Ақылы тұрақтарды мемлекеттік компания басқаратын болады”, – деді Өтебаев.

  • Экс-судья Светлана Жолмановаға қатысты қылмыстық іс сотқа жолданды

    Экс-судья Светлана Жолмановаға қатысты қылмыстық іс сотқа жолданды

    Алматыда Медеу аудандық сотының бұрынғы судьясының алаяқтық жасады деген күдікпен ұсталған болатын. 

     Аса ірі көлемдегі алаяқтық жасап айыпталған бұрынғы судья Светлана Жолмановаға қатысты қылмыстық іс бойынша сотқа дейінгі тергеп-тексеру аяқталды.

    Тергеудің мәліметінше 2021 жылдан 2024 жылға дейінгі кезеңде ол жылжымайтын мүлік сатып алуға және тендерлік жобаларға қатысуға жәрдемдесу сылтауымен, алдау және сенімге қиянат жасау арқылы азаматтардың 1 миллиард теңгеден астам сомадағы ақшалай қаражатын қолды қылған. Тергеп-тексеру барысында қылмыстық әрекеттің 48 эпизоды анықталып, олар бір іс жүргізуге біріктірілді.

    Тергеп-тексеру аяқталғаннан кейін қылмыстық іс Қазақстан Республикасы Қылмыстық кодексінің 190-бабы 4-бөлігінің 2) тармағы (аса ірі мөлшердегі алаяқтық) бойынша айыптау актісімен мәні бойынша қарау үшін сотқа жолданды.