Sona.kz

Метка: Басты жаңалықтар

  • Қазақстанда 17 мыңнан аса адам банкрот деп танылды

    Қазақстанда 17 мыңнан аса адам банкрот деп танылды

    Қазақстанда 17, 9 мың адам банкрот деп танылды. Соттан тыс банкроттық рәсіміне 131 мыңнан астам өтініш келіп түсті. Сонымен қатар 6,6 мың өтініш мемлекеттік кірістер органдарында қаралып жатыр.

    Банкорот деп танылған 17,9 мың азаматтың жалпы қарыз сомасы 40,9 млрд теңгені құрады. Қаржы министрлігі өкілінің айтуынша, банкроттық рәсімінің кейбір критерийлеріне сәйкес келмеген өтініштерге теріс жауап қайтарылған. Атап айтқанда, 12 айлық төлем қабілетсіздігі  болмауына байланысты; соттан тыс банкроттыққа жататын қаржы ұйымдарының тізімінде кредиторлардың болмауы; мүліктің болуы; кредитормен реттеу рәсімін  растайтын құжаттың болмауы; 1 600 АЕК көлеміндегі қарыз шегінен асып кетуі.

    «Азаматтар негізгі критерийлерді біле тұра, әлі де өтініш беріп, нәтижесінде бас тарту саны артып жатыр. Соттың банкроттық рәсімін және төлем қабілеттілігін қалпына келтіру тәртібін қолдануға 3,5 мыңнан астам азамат жүгінген. 131 борышкерге қатысты банкрот рәсімі жүргізілуде. Сот банкроттығы барысында 45 адам банкрот деп танылып, олар бойынша 13,6 млрд теңге қарыз кешірілді. 1 азамат 10 млн теңге сомасымен төлем қабілеттілігі қалпына келтірілуде. Екі банкроттық рәсім аясында барлығы 54 млрд теңге сомасына 17,8 мыңнан астам азамат банкрот деп танылды», – деді ҚР ҚМ МКК төрағаның орынбасары Сеилжан Ахметов.

  • Биыл тағы 78 ауыл жабылды

    Биыл тағы 78 ауыл жабылды

    Бір жыл ішінде еліміздегі 78 елді мекен қаңырап бос қалды. Оның сыртында қазір адам саны 50-ге де жетпейтін ауылдар көп, деп хабарлайды «Астана» телеарнасы.

    Бізде тұрғыны көп өлкеден теріскейге адам шоғырландыру жобасы бар. Бірақ оның да пайдасын көріп жатқанымыз шамалы. Депутаттар бағдарламаның жемқорларға желініп біткенін алға тартып отыр.

    Былтыр елде 6 286 ауыл болған. Биыл ол 6 208-ге қысқарды. Демек тағы 78 елді мекен жойылды деген сөз. Жалпы, соңғы 10 жылда ауыл саны айтарлықтай азайған. 500 елді мекеннің орнын сипап қалдық.

    Тұрғындар мұны жұмыстың жоқтығы, ақшаның аздығымен байланыстырады.

    Қазір елде адам саны 50-ге де жетпейтін 546 ауыл бар. Әрқайсысында шамамен тек 26 тұрғын өмір сүріп жатыр. Ал заң бойынша тұрғын саны 50 азаматтан аз болса, ол елді мекен жабылуға тиіс.

    Бірақ депутаттар мұнымен келіспейді. «Жай жаба берсек, алтын бесігімізден айырыламыз» дейді. Сол үшін Үкімет тиісті шаралар қабылдауы керек.

    Қазір халықтың 38%-ы ауылда тұрады. Бұл – 7,5 млн адам. Ал даму әлеуеті бар жерлердің саны – 3,5 мың. Соның ішінде 1,2 мыңы – тірек ауыл, 2,3 мыңы – серік-спутник саналады. Оларда ауыл халқының 90%-ы қоныстанған.

    «ҚР әкімшілік-аумақтық құрылысы туралы» заңының 2-бабы 3-тармағына сәйкес, халқының саны 50 адамнан азайған шаруа қоныстары мен өзге елді мекендер ең жақын елді мекеннің құрамына енгiзiледi. Мұндай ауылдық елді мекендердің тұрғындары орталық ауылдарда көрсетілетін қызметтерді пайдалана алады және осы жерде тұру құқығын сақтайды. Мемлекет оқушыларды тасымалдауды ұйымдастыруды, сондай-ақ пошта, медициналық қызметтер көрсетуді және басқасын қоса алғанда, базалық инфрақұрылымды қолдауды жалғастырып жатыр, – дейді премьер-министр Олжас Бектенов.

  • Декларация тапсырмаған азаматтардың есепшоты бұғатталады

    Декларация тапсырмаған азаматтардың есепшоты бұғатталады

    16 қыркүйекте жалпыға бірдей декларация тапсырудың үшінші кезеңі аяқталды. Мемлекеттік кірістер комитеті ұсынған ақпаратқа сәйкес, үшінші кезең аясында жеке кәсіпкерлер, олардың жұбайы, компания басшылары және құрылтайшыларын қоса алғанда 2 миллионнан аса жеке тұлған активтер мен міндеттемелер туралы декларация (250.00-нысан) ұсынды.

    Ал декларация ұсынбағандарға хабарлама жіберілген. Хабарламаны алған сәттен бастап 30 жұмыс күні ішінде мұндай адамдар декларацияны ұсынуы қажет немесе не себепті тапсырмағанын түсіндіруі қажет. Оны тапсырмаса, азаматтың банктегі шоттары бұғатталады.

    2024 жылдың 1 қаңтарынан бастап Қазақстанда жалпыға бірдей міндетті декларацияны кәсіпкерлер – заңды тұлғалардың басшылары мен олардың жұбайлары, сондай-ақ, жеке кәсіпкерлер мен олардың жұбайлары тапсыруға тиіс. Табыс мөлшері мен бизнестің ауқымы маңызды емес, үйде қарапайым жеке кәсіпкер ретінде жұмыс істейтін кондитерден бастап зауыт иесіне дейін талап ортақ.

    Салық төлеуші декларацияны электронды түрде салық төлеушінің кабинеті (cabinet.salyk.kz), «Электрондық үкімет» порталы (egov.kz) және «E-Salyq Azamat», «eGov mobile» Kaspi.kz, Halyk, Вcc.kz. мобильді қосымшалары арқылы ұсына алады.

    Кәсіпкер бірінші жылы 250-нысандағы активтер мен міндеттемелер туралы декларацияны тапсырады, оны «кіріс декларациясы» деп атайды. Онда декларациялау сәтіндегі барлық жинақталған мүлік пен ақша көрсетіледі (2023 жылғы 31 желтоқсандағы жағдай бойынша). Бұл форманы жалпыға бірдей декларациялау жүйесіне кірген кезде бір рет тапсырады.

    Ал келесі жылдары кәсіпкер 270-нысандағы кірістер мен мүлік туралы декларацияны тапсырып, онда бір жыл ішінде тапқан және алған табысын көрсетіп отырады. Бұл адамның бастапқы декларациясында не болғанын және кейін не қосылғанын көру үшін жасалады.

  • Қазақстанда 2027 жылы бокстан әлем чемпионаты өтуі мүмкін

    Қазақстанда 2027 жылы бокстан әлем чемпионаты өтуі мүмкін

    Ұлттық Олимпиадалық комитеттің мәліметінше, АҚШ-тың Колорадо-Спрингс қаласында World Boxing халықаралық бокс федерациясының Конгресі өткен. Жиын барысында Қазақстанның бокс федерациясы Лос-Анджелестегі Олимпиада ойындарына іріктеу турнирі ретінде cаналатын 2027 жылғы әлем чемпионатын өткізуге өтінім берді. Әлемдік ұйымның шешімі жақын арада белгілі болады.

    Қазақстан бокс федерациясы ресми түрде World Boxing ұйымының толыққанды мүшесі атанған еді. Қазақстан бұл ұйымға 52-ел болып қосылды. Сондай-ақ Өзбекстан да WB қатарына кірді. 2023 жылдың сәуірінде құрылған World Boxing құрамында қазір 55 мемлекет бар.

  • Иман Хелифтің ер адам екенін дәлелдейтін құжаттар табылды

    Иман Хелифтің ер адам екенін дәлелдейтін құжаттар табылды

    Француз журналисі Джаффар Айт Аудиа әлеуметтік желідегі парақшасында Хелифтің медициналық сараптамасының көшірмесін алғанын мәлімдеді.

    2023 жылғы сараптама нәтижесінде спортшыда 5α-редуктазаның II типті тапшылығы бары анықталған. Бұндай ауытқудың тек биологиялық тұрғыдағы ер адамдарда ғана  кездесетіні айтылған.

    Халықаралық Олимпиада комитеті (ХОК) Хелифтің трансгендер емес екеніне және медициналық сараптаманың заңды жасалғанына сенімді.

    Еске сала кетейік, 2024 жылғы Париж Олимпиадасы финалында Хелиф қытайлық спортшы Ян Люді 5-0 есебімен жеңіп, алтын медаль алған еді.

  • Алматыда қауіпті үйлердің тізімі жаңарды

    Алматыда қауіпті үйлердің тізімі жаңарды

    Тізімге рұқсат құжаттары жоқ үйлер, жобадан ауытқып немесе басқа да бұзушылықтармен салынған тұрғын үй кешендері енгізілді.

    «Тізімге рұқсат құжаттары жоқ, құрылысы әлі басталмаған нысандардың кіргенін атап өткен жөн. Басқарманың ақпараты бойынша мұндай ТК туралы мәліметтер интернет-ресурстарды мониторинг нәтижесінде анықталады», – делінген әкімдіктің баспасөз хабарламасында.

  • Хасан Қасымбаев екі айға қамалды

    Хасан Қасымбаев екі айға қамалды

    Алматы облысының полиция департаментінің хабарлауынша, 4 қарашада Алматы облысы Қонаев қаласының мамандандырылған тергеу соты Хасан Қасымбаевқа қатысты бұлтартпау шарасын таңдау туралы арызды қарады.

    Сот қаулысы бойынша Хасан Қасымбаев екі айға қамауға алынды.

    2024 жылдың 2 қарашасында Хасан Қасымбаевтың уақытша ұстау изоляторына қамалғаны белгілі болған еді.

    Белгілі болғандай, ол Шерзат Болаттың өліміне қатысты ұсталмаған. 2021 жылы ережесіз жекпе-жектен жаттықтырушы Арман Әлімовтің денсаулығына қасақана ауыр зиян келтірді және ұрлады деген күдікке ілінген.

  • «Алматы Бас жоспары» бас директорының орынбасары сотталды

    «Алматы Бас жоспары» бас директорының орынбасары сотталды

    Алматы қаласы Медеу ауданының сотымен «Алматы Бас жоспары» ЖШС бас директорының орынбасары С. Өмірәліұлына қатысты сот үкімі шықты.

    Антикор мәліметінше, ол алаяқтық жасағаны және жергілікті кәсіпкерді жер учаскесінің нысаналы мақсатын өзгерткені үшін қалалық жер қатынастары басқармасының лауазымды адамына 9,6 млн теңге көлемінде пара беруге итермелегені үшін кінәлі деп танылған.

    Сот үкімімен оған мемлекеттік қызметте және квазимемлекеттік сектор субъектілерінде қызмет атқару құқығынан өмір бойына айыра отырып, 3 жыл 6 ай мерзімге бас бостандығынан айыру жазасы тағайындалды.

    Сот үкімі заңды күшіне енген жоқ.

  • Қаржы министрлігі: Мемлекеттік қызметшілерге сыйақы беруге тыйым салынған жоқ

    Қаржы министрлігі: Мемлекеттік қызметшілерге сыйақы беруге тыйым салынған жоқ

    Қазақстан Республикасы үкіметінің 2001 жылдың 29 тамызындағы №1127 қаулысына сәйкес мемлекеттік қызметшілерге сыйақы төлеу, материалдық көмек көрсету, лауазымдық айлықақыларына үстемеақылар белгілеу бюджет қаражатын үнемдеу есебінен ғана жүзеге асырылады. Бұл туралы Қаржы министрлігі мәлімдеді.

    Министрліктің мәліметінше, аталған қаулы арқылы шығыс баптарының нақты тізбесі айқындалған. Олардың есебінен үнемдеу қалыптасқан жағдайда ғана сыйақы төленуі мүмкін (іссапарларға, коммуналды және көлік қызметтеріне, байланыс қызметтеріне, үй-жайларды жалға алуға және т.б. шығыстар бойынша үнемдеу).

    «Бүгінде аталған қаулыға, сондай-ақ басқа да заңнамалық актілерге сыйақыларды шектейтін өзгерістер енгізілмегендіктен мемлекеттік қызметшілерге сыйақыларды беруге тыйым салатындай негіз жоқ. Қаржы министрлігінің осыған дейінгі хабарламасында үкімет қаулысының нормаларын бұлжытпай ұстану қажеттігі және бағдарлама әкімшілерінің қызметкерлерді тізбеде көрсетілгендерден бөлек бюджеттік баптардан қаражатты сыйақыға пайдалануға жол бермеу туралы айтылған болатын. Инвестициялық жобаларды іске асырудан және мемлекеттік аппараттың жұмысына әсер етпейтін материалдық активтерді сатып алудан үнемделген қаражат бюджетке қайтарылуға тиіс», – делінген хабарламада.

  • Жер сілкінісі: Талғар ауданы оқушыларды үйіне қайтарды

    Жер сілкінісі: Талғар ауданы оқушыларды үйіне қайтарды

    Талғар ауданы бойынша білім бөлімі бүгінгі күні жер сілкінісіне байланысты барлық білім беру ұйымдарында сабақ болмайтындығын және қашықтықтан оқыту жүргізілетінін хабарлады.

    Алматы облысы білім басқармасының мәліметінше, Еңбекшіқазақ ауданы бойынша Есік өңіріндегі  6 мектептің 6960 баласы және жақын ауылдардағы мектептер мен балабақшалардың балалары үйлеріне қайтарылған. Талғар ауданында барлығы 42 мектеп бар. Соның ішінде Талғар қаласындағы 10 мектептің  12529 оқушысы және балабақша тәрбиеленушілері үйлеріне жіберілген.

    «Бүгін Талғар ауданы бойынша жер сілкінісіне байланысты мектептерде сабақ тоқтатылды. Бірақ қашықтықтан тапсырма беріліп, қадағаланады. Ал балабақшадағы балаларды кей ата-аналар алып кетіп жатыр», – деді Білім басқармасынан.

    Бүгін, 5 қарашада Астана уақытымен 10 сағат 1 минутта Алматы облысы мен Алматы қаласында жер сілкінді. Жер сілкінісі ошағы Алматы қаласынан шығысқа қарай 33 км жерде болған. Қуаты Алматыда 3 балды көрсеткен. Талғар, Есік қалаларында 4 балға дейін байқалған.