Sona.kz

Метка: Қонаев

  • Қонаевтағы туризм: 1 млрд теңгеден астам сомаға қызмет көрсетілді

    Қонаевтағы туризм: 1 млрд теңгеден астам сомаға қызмет көрсетілді

    Мәліметке сәйкес, биыл Қапшағай су қоймасының жағалауына 1,8 млн демалушы келді. Қаладағы 140-тан астам туристік нысан жыл басынан 1 млрд 200 млн. теңгеден астам сомаға қызмет көрсетті. Бұл өткен жылдың есептік кезеңімен салыстырғанда 100 млн теңгеге артық.

    «2025 жылы былтырдан қарағанда демалушылардың саны 300 мыңға өсті. Мұның себебі «АСП арена» аумағында түрлі концерттер, іс-шаралардың ұйымдастырылуы, ашық суда жүзуден жарыстың өтуі, апта сайын «Aspan fest» фестивалінің ұйымдастырылуы болды. Бұдан бөлек, №5 жағажайдың жаңғыртылып, абаттандырылуы да демалушылар санының артуына айтарлықтай әсер етті. Бұл жағажайға демалыс күндері 5000-ға жуық адам келді», — деді бөлім басшысының м.а. Айдын Әбілқасым.

    Сондай-ақ ол қауіпсіздік шараларына да ерекше көңіл бөлінгенін атап өтті. ТЖД-ның 73 маманы судағы қауіпсіздікті, полицияның 12 қызметкері қоғамдық тәртіпті қадағалап отырды, күнделікті рейдтік шаралар жүргізілді.

    «Баршаңызға мәлім, қалада 8 коммуналдық жағажай болса, оның ішінде №5,6,7-ші жағажайларға келушілер көп. Әрқайсында медпункттер, санитарлық аймақтар, құтқарушылардың жұмысы ұйымдастырылды», — деді маман.

    Жағажайдан басқа, Қонаев қаласының аумағында «Көшпенділер қалашығы», тарихтан сыр шертетін «Таңбалы тас» шатқалы орналасқан. Бұл нысандардың да халық арасында танымалдылығы жоғары болып отыр. Мысалы, алғашқы туристік аймақ айына 300-500 адамды қабылдауда. Ал «Таңбалы тасты» көруге 4000-ға жуық турист келген.

    «Көшпенділер қалашығы» шығармашылық топтары үшін де танымал нысан. Биыл мұнда екі түрлі жанрда кино, «Жібек жолы» арнасында көрсетілетін бірегей бағдарлама түсірілді», — деді Айдын Әбілқасым.

    Алдағы жоспар

    Биыл №6 жағажайды абаттандыру жұмыстары басталады деп көзделуде. Қаладағы жалпы ұзындығы 6,1 шақырым (1 км астамы қолданыста) болатын жағажай жаңғыртылады.

    «Көшпенділер» қалашығын туристік бағытта заманауи үлгіде дамыту үшін жобалар қарастырылуда.
    Сонымен қатар шаһарда 11 инвестжоба жүзеге асады деп жоспарлануда. Тартылатын инвестиция көлемі – 306,4 млрд.теңге.

  • Қонаевта 2,2 мыңнан астам тұрғын табиғи газға қосылды

    Қонаевта 2,2 мыңнан астам тұрғын табиғи газға қосылды

    Алматы облысы бойынша ҚР Ұлттық экономика министрлігінің Табиғи монополияларды реттеу комитеті департаментінің басшысы Гүлмира Өтегенова Қонаев қаласында орналасқан «Қапшағай өңірінің газ желілері» ЖШС нысандарына баспасөз турын өткізді. Іс-шараға журналистер, депутаттар, мемлекеттік органдар мен қоғамдық бірлестіктердің өкілдері қатысты.

    Компания директоры Батурин Абдримов жобалардың жүзеге асырылу барысы туралы баяндап, 2021–2025 жылдарға арналған жалпы сомасы 173,2 млн теңге инвестициялық бағдарлама бекітілгенін айтты. Оның ішінде 2024 жылға 39,4 млн теңге қарастырылған.

    Бағдарлама аясында Қонаев қаласының 1-шағынауданында ұзындығы 2,5 шақырым төмен қысымды газ тарату желісінің құрылысы толық аяқталды. Нысан пайдалануға беріліп, 2 271 тұтынушы газға қол жеткізді. Оның ішінде 1 680 абонент бүгінде қосылып үлгерді.

    Биылғы жылы құны 38,1 млн теңгені құрайтын жұмыстар жалғасуда. Қазір №18 шағынауданда ұзындығы 2,2 шақырым болатын газ желілерінің құрылысы басталды. Жоба толық аяқталғаннан кейін тағы 2 мыңнан астам тұрғын көгілдір отынға қосылады.

    Құрылыс жұмыстарын 2025 жылдың желтоқсан айында аяқтау жоспарланған.

  • Қонаевта Қарлығаш шағынауданының жолы күрделі жөндеуден өтуде

    Қонаевта Қарлығаш шағынауданының жолы күрделі жөндеуден өтуде

    Қонаев қаласының Қарлығаш шағынауданында ауқымды жол жөндеу жұмыстары басталды. Жобаға сәйкес 7,4 шақырым автомобиль жолы толықтай жаңартылып, 8,5 шақырым жаяу жүргіншілерге арналған тротуар салынады.

    Сонымен қатар тұрғындардың қолайлылығы үшін 9 жаңа аялдама орнатылады, 335 көше шамы қойылады. Бұл жұмыстардың нәтижесінде шағынауданның барлық көшелері жол инфрақұрылымымен толық қамтылмақ.

    Жобаның аяқталу мерзімі – 2025 жылдың желтоқсан айы деп жоспарлануда.

    Аталған шаралар Қарлығаш шағынауданындағы тұрғындардың тұрмыс сапасын арттырып, көлік қозғалысы мен жаяу жүргіншілердің қауіпсіздігін қамтамасыз етуге бағытталған.

  • Мектепке жол: Қонаевта 1778 балаға көмек көрсетілді

    Мектепке жол: Қонаевта 1778 балаға көмек көрсетілді

    Бұл туралы қалалық білім бөлімінің басшысы Қаламқас Сәрсенбаева айтты.

    «Әлеуметтік осал топтарынан шыққан балаларды мектеп формасымен және оқу құралдарымен қамтамасыз ету бойынша 1778 оқушы көмек алды. Оның ішінде жалпыға бірдей білім беру қорынан 60 096 400 теңге бөлінді. Бұл қаражат 1300 оқушының (әр балаға – 46 228 теңге) заңды өкілдерінің шотына аударылды», – деді бөлім басшысы.

    Ол «Мектепке жол» қайырымдылық акциясы аясында 478 балаға көмек көрсетілгенін де атап өтті. Жалпы қаражат сомасы 6 млн 625 мың теңгені құрады.

    Сондай-ақ аталған акция шеңберінде мектеп тауарларының жәрмеңкесі өтті.

    Айта кетейік, 30 қыркүйекке дейін ата-аналардың өтініштері бойынша «жедел желі» жұмыс істейді. Ол арқылы 70-тен астам ұсыным, өтініштер түскен. Қала мектептерінде 13000-нан астам оқушы білім алады.
    ___

  • Қонаевта күрделі жөндеуден өткен мектеп ашылды

    Қонаевта күрделі жөндеуден өткен мектеп ашылды

    Қонаев қаласында Қ.Қайсенов атындағы №4 орта мектеп күрделі жөндеуден өтіп, ашылды.

    Алғашқы қоңырау салтанатында балалар 1-сыныпқа қабылданып, барлығы 1628 оқушы жаңа оқу жылын жаңартылған мектепте бастады.

    Салтанатты шараға Қонаев қаласы әкімінің орынбасары Сәуле Нұрсолтанова қатысып, жиналған жұртты айтулы күнмен құттықтады.

    «Бүгінгі күн – біздің еліміз үшін ғана емес, әрбір отбасы үшін ерекше әрі маңызды. Себебі, жаңа оқу жылының басталуы – жас ұрпақтың болашаққа қадам басар сәті. Баршаңызды жаңа оқу жылының басталуымен құттықтай отырып, білім жолында барлық жетістіктерге жетулеріңізге тілектеспін!» – деді ол.

    Ал ата-аналардың тарапынан Юлия Трофимова сөз алып, балақайлардың зейіні ашылуына тілектестігін білдірді.

    Айта кетейік, А.Жұбанов атындағы №5 орта мектептің күрделі жөндеу жүргізуге жабылуына байланысты бастауыш сыныптың оқушылары Қ.Қайсенов атындағы орта мектепте, 5-11-сыныптағылар орта мектеп-гимназияда білім алатын болады.

    Бүгінде қала мектептерінде барлығы 13 377 оқушы білім алуда. Өткен оқу жылында 631 түлек мектеп бітірді. Оның ішінде:
    • «Алтын белгі» – 45 оқушы,
    • Үздік аттестат – 66 оқушы.

    Жалпы саны 465 түлек қазақстандық ЖОО-ларға түсті, оның ішінде 3 оқушы облыс әкімінің грантының иегері атанды. Сонымен бірге, 48 түлек Ресей жоғары оқу орындарына, 50 түлек алыс және жақын шетелдердегі университеттерге қабылданды. Барлығы 342 түлек грант иегері болды, бұл – 54,1%.

    Жыл қорытындысы бойынша қаладағы білім сапасы 68,3% құрап, алдыңғы жылмен салыстырғанда 4,3%-ға артты.

  • «Көшпенділер қалашығы» Қонаев қаласының меншігіне қайтарылды

    «Көшпенділер қалашығы» Қонаев қаласының меншігіне қайтарылды

    Бұған дейін нысанға Ш.Айманов атындағы «Қазақфильм» Ұлттық киностудиясы иелік еткен.

    Қазіргі таңда қалашық ескіріп, кейбір жабдықтары сынып, бастапқы келбетін жоғалтқан. Бірнеше келіссөздер жүргізу нәтижесінде киностудия декорациялық кешенді Қонаев қаласына сыйға тарту шартымен өткізіп берді. Аталған нысанның аумағы 5,8 гектарды құрайды, Іле өзенінің сол жақ жағалауында орналасқан. Баланстық құны – 15 402 000 теңге.

    Қалалық Мемлекеттік активтер және сатып алу бөлімінің мәліметінше, енді қалашық ТҮКШ бөліміне қарасты болады. Алдағы уақытта бұл аумақты туризм бағытында дамыту көзделіп отыр. Сондай-ақ оны күтіп ұстауға, ағымдағы жөндеу жасауға бюджеттен қаржы қарастырылады.

    Бүгінде инфрақұрылымды дамыту мақсатында жұмыстар басталған. Қалашыққа апаратын күре жол салынып жатыр. Жолдың ұзындығы – 7 шақырымға жуық. Жоба бойынша қосымша электр желілерін тарту, автотұрақ салу, жол бойын жарықтандыру қарастырылған. Күре жолдың ені – 7 метр, 2 жолақты болады. Құрылысқа 41 адам және 24 техника тартылған. Жол салу жұмыстары жыл соңына дейін аяқталады деп күтілуде.

  • Конституция күні: Қонаевта 42 отбасы баспаналы болды

    Конституция күні: Қонаевта 42 отбасы баспаналы болды

    Биыл Қазақстанның Конституциясына 30 жыл толып отыр. Айтулы мереке аясында Қонаев қаласының тұрғындары да қуанышты жаңалықпен бөлісті.

    Конституция күніне орай қалада 42 отбасы жаңа қонысқа кірді. Кілттерді салтанатты түрде қала әкімі Асхат Бердіханов табыстады. Оның айтуынша, тұрғын үй құрылысының қарқынды жүруінің арқасында пәтер кезегі жылдам жылжуда.

    — «Алдағы жылдары жалпы аумағы 161 мың шаршы метрді құрайтын 72 тұрғын үй салынады. Облыс орталығы мәртебесін алғаннан бері 193 отбасы қоныс тойын тойлады. Оның ішінде биылдың өзінде 108 пәтер кілті берілді», — деді әкім.

    Бұл күні Қарлығаш шағынауданында көпбалалы, жетім және әлеуметтік осал топтағы азаматтарға 18 жер үй берілді. Сонымен қатар 24 пәтердің кілті табысталды. Барлығы 42 отбасы баспаналы болды. Жыл соңына қарай бұл көрсеткіш 200-ден асатыны күтілуде.

    Қоныс иелерінің бірі — Динара Таурбаева. Ол мүгедектігі бар екі баласын тәрбиелеп отыр. «Көп жылдан бері кезекте тұрдым. Бүгінгі қуанышым шексіз. Әр отбасы осындай жақсылыққа қол жеткізсін. Конституция күнінің бізге осындай сый әкелгеніне қуаныштымыз», — деді ол.

    Айта кетейік, берілген үйлер сатып алу құқығымен жалға берілді. Алғашқы жарнаны төлеу арқылы оларды жекешелендіруге болады. Қазіргі таңда Қонаев қаласында 3800-ден астам тұрғын үй кезегінде тұр. Пәтер алу үшін «Отбасы банкінің» филиалына жүгіну қажет.

  • Инфрақұрылым, абаттандыру және экология: Қонаев қаласының ТҮКШ бөлімі жартыжылдықты қорытындылады

    Инфрақұрылым, абаттандыру және экология: Қонаев қаласының ТҮКШ бөлімі жартыжылдықты қорытындылады

    Қонаев қаласында инженерлік инфрақұрылымды дамыту, аулалар мен қоғамдық кеңістіктерді абаттандыру, тұрғындарға қолайлы жағдай жасау бағытында ауқымды жұмыстар жалғасуда.

    Инженерлік желілер мен жарықтандыру

    «Қарлығаш», «Восточная», 12А, 12Б және 19-шағынаудандарында 30 мың метр әуе желісі (ВЛ-10 кВ) заманауи кабельдерге ауыстырылды. Жаңа трансформаторлық қосалқы станциялар орнатылып, жабдықтар жаңартылды. Шығыс шағынауданында қуаты 630 кВА болатын алғашқы қосалқы станция іске қосылды, екіншісі үшінші тоқсанда орнатылады.

    Сонымен қатар 600 көше шамы орнатылуда, оның 100-і пайдалануға берілді. Жарықтандыру «Спутник», «Қарлығаш», 12А және 12Б шағынаудандарында жүргізіледі.

    Газдандыру және сумен қамту

    Қала дамуының кешенді жоспары аясында №19, 20, «Арна», «Спутник» және «Рауан» шағынаудандарын газдандыру жұмыстары жүргізілуде. Жобаның тапсырыс берушісі – Алматы облысы әкімдігінің салалық басқармасы.

    Сумен қамту жүйесіне де ерекше көңіл бөлінуде: 2 шақырымнан астам су құбыры және шамамен 1,8 шақырым кәріз желісі жаңартылды. Тағы бес шағынаудандағы желілерді қайта құруға жобалық-сметалық құжаттама әзірленіп жатыр.

    Аулалар мен қоғамдық кеңістіктерді абаттандыру

    49 ауланың аумағында балалар және спорт алаңдары, қоршаулар, орындықтар мен қоқыс жәшіктері орнатылды. «Халық қатысатын бюджет» бағдарламасы аясында тағы 15 қоғамдық кеңістікті абаттандыру көзделуде.

    Қалада 15 тұрғын үйдің қасбеті боялып, 20-дан астам көпқабатты үйдің шатыры ауыстырылды.

    Спорт инфрақұрылымына да назар аударылды: аумағы 2,1 гектарды құрайтын спорт аймағы жаңғыртылды. Мұнда жағажай волейболы мен футбол алаңдары, воркаут аймағы, балалар ойын алаңдары, шахмат пен тоғызқұмалақ үстелдері орнатылды. Тротуар қазақы оюлармен көмкеріліп, алтыбақан қойылды, ал ортасына гүлден ерекше композиция орналастырылды.

    Сонымен қатар Қойшыманов көшесінде абаттандыру жобасы іске асуда: мұнда сәндік жарықтандыруы бар жаяу жүргіншілер аллеясы, шағын сәулеттік нысандар, жасыл аймақтар мен арт-объектілер пайда болады.

    Экология және санитарлық қауіпсіздік

    Қалалық қатты тұрмыстық қалдықтар полигонында көлемі 30 текше метр болатын су қоймасы салынып жатыр. Ол өрт шыққан жағдайда уақыт жоғалтпай әрекет етуге мүмкіндік береді.

    Полигон аумағында траншеялар қазылып, темір тор және бетон қоршаулар орнатылуда. Бұл қоқыстың жан-жаққа ұшуын және малдың кіруін болдырмау үшін жасалуда. Алдыңғы бөлігі көгалдандырылып, арнайы техникаларға арналған таразы мен көлікті жуу алаңы орнатылады.

    Сонымен қатар қалада зиянды жәндіктерге, қарақұртқа, масаға және кеміргіштерге қарсы дезинсекция, дератизация жұмыстары жүргізілді.

    Жыл соңына дейінгі жоспар

    «Біздің мақсат – тек желілерді жөндеп немесе шам орнатып қана қоймай, қаланы кешенді дамыту. Қонаев тұрғындары үшін ыңғайлы әрі қауіпсіз жағдай жасауға тырысамыз. Қала заманауи, әдемі әрі жайлы болуы тиіс», – деді Тимур Ақмырзаев.

    Жыл соңына дейін жылу желілерін күрделі жөндеу, көгалдандыруды жалғастыру, 1 және 5-шағынаудандардағы аулаларды абаттандыру жоспарланған. Сондай-ақ орталық алаңда биіктігі 55 метрлік жаңа Ту тұғыры орнатылуда.

  • Қонаевта 7 км су және кәріз желілері жаңартылып жатыр

    Қонаевта 7 км су және кәріз желілері жаңартылып жатыр

    Қонаев қаласында инженерлік инфрақұрылымды жаңғырту жұмыстары жалғасуда. «Қонаев Су Арнасы» ШЖҚ МКК директоры Мади Темірәлиев Табиғи монополияларды реттеу департаменті өкілдеріне есеп беріп, жүзеге асқан жобалар туралы баяндады.

    Оның айтуынша, мекеменің техникалық базасын жаңартуға және тозығы жеткен желілерді ауыстыруға бағытталған бес жылдық бағдарлама қабылданған. Соның ішінде 2024–2025 жылдарға жалпы құны 462 миллион теңгені құрайтын жоспар іске асырылып жатыр. Бағдарлама аясында ұзындығы 7 шақырымнан асатын су және кәріз желілері жөнделуде, сондай-ақ сүзгі станцияларына жеті жаңа сорғы орнатылды.

    Табиғи монополияларды реттеу департаментінің басшысы Гүлмира Өтегенованың айтуынша, аталған шаралар «Тарифті инвестицияға айырбастау» бағдарламасы аясында жүзеге асуда. Бұл бастама қала тұрғындарын сапалы ауыз сумен үздіксіз қамтамасыз етуге бағытталған.

    «Қонаев қаласына тәулігіне шамамен 20 800 текше метр су қажет. Осы көлемді тұрақты жеткізу үшін инфрақұрылымды жаңарту қолға алынды. Сүзгі станцияларындағы жабдықтар ауыстырылып, мекеме өзекті мәселелердің оңтайлы шешімін табуда. 2026 жылдың шілдесіне дейін ауыз су тарифі өзгермейді, негізсіз өсім болмайды», – деді ол.

    Сонымен қатар, келер жылы жаңа бес жылдық бағдарлама бекітіліп, коммуналдық мекемелер үшін арнайы Ұлттық жобаға қатысу жоспарланып отыр.

    Кейіннен департамент басшысы атқарылған жұмыстармен танысу үшін бірнеше нысанды аралап көрді.

    ? Еске салсақ, бұған дейін Қонаевта кәріз-тазарту жүйесінің де күрделі жөндеуден өтетіні хабарланған.

  • Қонаев маңында алғаш рет қауын егіліп, гектарына 40 тонна өнім жиналуда

    Қонаев маңында алғаш рет қауын егіліп, гектарына 40 тонна өнім жиналуда

    Қонаев қаласына қарасты Шеңгелді ауылдық округінде күзгі жиын-терім жүріп жатыр. Бұған дейін негізінен пияз егумен танылған өңір шаруалары соңғы жылдары ауыл шаруашылығын әртараптандыруға (диверсификация) бет бұра бастады.

    Соның айғағы ретінде биыл «Марьям» шаруа қожалығы алғаш рет қауын егіп отыр. Жалпы 280 гектар жерді игеріп отырған қожалық, 2 гектарға 4 түрлі қауын отырғызып, гектарына 40 тоннадан өнім алынуда.

    «Қауын еліміздің оңтүстігінде көп өсіріледі. Биыл біз де тәжірибе ретінде егіп көрдік. Өнім өте сапалы болып шықты. Тәттілігіне өзге кәсіпкерлер де таңғалып, мақтап отыр. Өнімді негізінен Алматыдағы ірі базарларға жөнелтеміз. Ендігі жылы қауын алқабын ұлғайтуды жоспарлап отырмыз», – деді қожалық басшысы Бекзат Заманбеков.

    Қожалық бұдан бөлек, 220 гектарға жүгері, 20 гектарға бақша дақылдарын, 14 гектарға пияз, 30 гектарға жоңышқа еккен. Алдағы уақытта егістік аумағын 500 гектарға дейін кеңейту көзделіп отыр.

    Сонымен қатар шаруашылық иесі мемлекет тарапынан инфрақұрылымды дамытуға субсидия алу үшін құжаттар рәсімдеп жатқанын айтты. Бұған дейін «Кеңдала-2» бағдарламасы арқылы 40 млн теңге несие алған.

    Шеңгелдіде пияз егумен айналысатын «Бауыр» шаруа қожалығы биыл 70 гектар аумақты игерген. Қазір 20 гектардан 1600 тонна өнім алды. Күзгі жиын-терім жұмыстары қыркүйек айына дейін жалғасады.

    Жалпы 2025 жылы Шеңгелдіде 11 769 гектар жер игерілді. 13 шаруа қожалығы 2000 гектар аумақта су үнемдеу технологияларын қолдануда (900 гектар – жаңбырлатып, 1100 гектар – тамшылатып суару). Биылғы науқан кезінде 315 тонна бидай, 3127 тонна арпа, 1750 тонна картоп, 1950 тонна пияз, 4430 тонна бақша дақылдары және 21 247 тонна мал азығы жиналды. Күзгі жиын-терім нәтижесі туралы кейінірек қосымша ақпарат беріледі.

    Күзгі дала жұмыстарына 119 тонна арзандатылған дизель отыны бөлініп, шаруалармен келісімшарттар жасалды.