Sona.kz

Рубрика: Жаңалықтар

  • Семейдегі соққыға жығылған оқушыға қатысты білім басқармасы мәлімдеме жасады

    Семейдегі соққыға жығылған оқушыға қатысты білім басқармасы мәлімдеме жасады

    Семейде 6-сынып оқушысын қатарластары ұрып, мүшеқапты үрлеуге мәжбүрлеген оқиғаға қатысты облыстық білім басқармасы мәлімдеме жасады.

    Білім басқармасының мәліметінше, осы жылдың 24 ақпанында оқушы сабағына қатысқан, ал соққыға жығылғаннан кейін медициналық көмекке жүгінбеген.

    Құқық қорғау органдары қазір тиісті шараларды жүргізіп жатыр, оның қорытындысы бойынша қатысушылар есепке алынып, ата-аналары жауапқа тартылатын болады.

    «Абай аудандық білім басқармасы қызметтік тексеру жүргізіп жатыр. Оның қорытындысы бойынша бақылаудың әлсіздігі және тәрбие жұмысының жеткіліксіздігі үшін мектеп директорлары мен олардың орынбасарларының жауапкершілігі тексерілетін болады. Жағдай ерекше бақылауда», – деп атап өтті ведомство.

  • «Ауызашарды – ифтар, сәресін – сухур» дейтіндер көп – Бас мүфти

    «Ауызашарды – ифтар, сәресін – сухур» дейтіндер көп – Бас мүфти

    Сан ғасырдан бері мұсылмандық жолды ұстанған бабаларымыз ана тіліміздегі сөздерді қолданған. Бұл туралы елордада өткен баспасөз мәслихатында Бас мүфти Наурызбай қажы Тағанұлы мәлім етті.

    «Осы ретте жастарды діни терминдерді қазақша айтуға шақырамын. Өкінішке қарай, кейбір жас буын өкілдерінің ауызашарды – ифтар, сәресін – сухур деп айтып жүргені көңілге қаяу түсіреді. Сан ғасырдан бері мұсылмандық жолды ұстанған ата-бабаларымыз ауызашар, сәресі деген сөздерді қолданған. Біз де бабалар жолын ұстанған ұрпақ ретінде өзге тілден енген діни терминдерден барынша аулақ болып, өзіміздің ата-бабамыздан қалған жақсы сөздерді қолданып, өзіміздің ана тілімізге құрмет көрсетіп, қазақша сөйлеуге тырысайық», – деді Наурызбай қажы Тағанұлы.

    Қазақстан мұсылмандары діни басқармасы ортақ пәтуаға сәйкес, қасиетті Рамазан айы 1 наурызда басталатынын хабарлап отыр. Наурыз айының 26-нан 27-не қараған түн – Қадір түні, ал 30 наурыз – Ораза айт мерекесі.

    Еліміздің Бас мүфтиі Наурызбай қажы Тағанұлының төрағалығымен өткен Қазақстан мұсылмандары діни басқармасының төралқа мәжілісінде пітір садақасы еліміз бойынша екі келі ұнның орташа бағасы негізінде 655 теңге болып бекітілді.

     

     

  • 8 жасар қызына қорлық көрсеткен әке өмір бойына сотталды

    8 жасар қызына қорлық көрсеткен әке өмір бойына сотталды

    Солтүстік Қазақстанда сегіз жасар қызын зорлаған әке өмір бойына бас бостандығынан айырылды. 

    Halyqstan мәліметінше,  Петропавлдың қылмыстық істер жөніндегі ауданаралық соты 29 жастағы Әділхан Сәкеновке қатысты үкім шығарды. Ол 121-бап «жыныстық сипаттағы зорлық-зомбылық әрекет» бойынша өмір бойына бас бостандығынан айырылды.

    Сот жабық есік жағдайында өтіп, қылмыстың жай-жапсары ресми түрде жарияланбады. Дереккөз мәліметінше, Сәкенов сегіз жасар қызын зорлап, оны видеоға түсіргені анықталған.

    «Сот Әділхан Сәкеновті 121-баптың 4-бөлігі, яғни қылмыстық құқық бұзушылық жасағаны үшін кінәлі деп танып, өмір бойына бас бостандығынан айыру үкімін шығарды», – деді облыстық қылмыстық істер жөніндегі мамандандырылған ауданаралық сотының судьясы Ерлан Нұршәріп.

    Анықталғандай, сотталушының жоғары білімі мен жұмысы бар, ресми түрде некеде болмаған. Үкімді жариялаған кезде Сәкенов ешқандай эмоция білдірмеген.

    Сонымен қатар, Сәкенов Мұсабаеваға, яғни оның 8 жасар қызының заңды өкіліне  моральдық зиян келтіргені үшін 3 миллион теңге төлеуге міндеттелді.

  • FIFA вице-президенті Қазақстанға келді

    FIFA вице-президенті Қазақстанға келді

    Іс-сапар барысында Федерация президенті Марат Омаров Шандор Чаньиге ҚФФ кеңсесінде таныстыру экскурсиясын өткізіп, федерацияның қызметі туралы баяндады. Сондай-ақ, футбол үйіндегі манежді көрсетті.

    Кездесу барысында тараптар Қазақстанда футболды дамыту, FIFA және UEFA ұйымдарымен ынтымақтастықты нығайтудың маңызын атап өтті.

    Бұған қоса, футбол бастамаларын жүзеге асыруда өзара қолдау көрсету қажеттігі жайлы өзекті мәселелерді талқыланды.

    Шандор Чаньи жаңадан ҚФФ президенті болып сайланған Марат Талғатұлын қызметімен құттықтап, екіжақты ынтымақтастықтың жемісті болатынына сенім білдірді.

    Сондай-ақ, FIFA мен UEFA Қазақстанда футболдың дамуын жан-жақты қолдауға дайын екенін ерекше атап өтті.

  • Жаңа Төтенше жағдайлар вице-министрі тағайындалды

    Жаңа Төтенше жағдайлар вице-министрі тағайындалды

    ҚР Үкіметінің 2025 жылғы 21 ақпандағы қаулысымен бұрын Қазақстан Республикасы Төтенше жағдайлар министрлігі Өртке қарсы қызмет комитетінің төрағасы болған Камалов Рамиль Фаткулович Қазақстан Республикасының Төтенше жағдайлар вице-министрі болып тағайындалды.

    1976 жылы Ақмола облысында дүниеге келген. Білімі арнайы жоғары.

    Азаматтық қорғау органдарында 1993 жылғы қыркүйектен бастап қызмет атқаруда. Мемлекеттік өрт қадағалау инспекторынан Өртке қарсы қызмет комитетінің төрағасына дейінгі лауазымдарда қызмет атқарды. Солтүстік Қазақстан облысы Төтенше жағдайлар департаментін басқарды.

  • Науқастарға жәрдемақысын бермей қойған онкологиялық аурухана бастығы жазаланды

    Науқастарға жәрдемақысын бермей қойған онкологиялық аурухана бастығы жазаланды

    Алматыда жәрдемақы алмай қалған онкологиялық науқастардың құқықтары қорғалды. Алматыда онкологиялық науқастарды әлеуметтік жәрдемақы алу мүмкіндігінен айырған емхана басшылары жауапқа тартылды.

    Алматы прокуратурасының мәліметінше, онкологиямен ауыратын науқастар жәрдемақы алу мүмкіндігінен айырылған.

      – Қала прокуратурасы онкологиямен ауратын науқастарға мүгедектікті рәсімдемей, кепілдендірілген әлеуметтік жәрдемақы алу мүмкіндігінен айырған бірнеше емхананы анықтап, оның жолын кесті, – деп хабарлады прокуратурадан.

    Қадағалау актісі бойынша қалалық емханалардың 9 басшысы тәртіптік жауапқа тартылды, 8 пациентке І-топ мүгедектігі берілді.

  • Шығыс Қазақстандағы екі ауданда жұмыс уақыты 1 сағатқа кері шегерілді

    Шығыс Қазақстандағы екі ауданда жұмыс уақыты 1 сағатқа кері шегерілді

    Шығыс Қазақстан облысындағы Марқакөл және Үлкен Нарын аудандарында жұмыс уақыты 1 сағатқа кері шегерілді.

    24 ақпаннан бастап Марқакөл және Үлкен Нарын аудандарында өңірдің табиғи жағдайларына бейімделген жаңа жұмыс уақыты енгізілді. Енді жұмыс күні сағат 08:00-де басталып, 17:30-да аяқталады, түскі үзіліс 12:00-ден 13:30-ға дейін.

    – Бұл өзгерістер таңның ерте атуы мен кешкі батуымен байланысты. Осылайша, тұрғындарға күндізгі уақытты тиімдірек пайдалануға мүмкіндік беріледі. Шешім жұртшылықпен талқыланғаннан кейін қабылданды. Сондай-ақ облыстық басқарма басшыларынан құралған мобильді топ бұл бастаманы жер-жерде талқылады, – деп хабарлады аудан әкімдіктерінен.

    Айта кетейік, бұған дейін мұндай өзгеріс Катонқарағай ауданында енгізілген. Қазір ондағы 40 мекеме аптасына бес күн сағат 08:00-ден 17:30-ға дейін жұмыс істейді.

     

  • Руслан Берденов жаңа қызметке тағайындалды

    Руслан Берденов жаңа қызметке тағайындалды

    Шымкент қаласы әкімінің баспасөз қызметі ұсынған ақпаратқа сүйенсек, тағайындау туралы шешім Президент Әкімшілігімен келісе отырып қабылданған.

    Руслан Берденов Шымкент қаласының тумасы. 39 жасында мемлекеттік қызмет пен бизнесті мол тәжірибесі бар.

    Қазақ, ағылшын, орыс, түрік, азербайжан тілдерінде еркін сөйлейді.

    Білімі жоғары, 2006 жылы менеджмент мамандығы бойынша әл-Фараби атындағы Қазақ ұлттық университетін бітірген. 2009 жылы КИМЭП Университетін Іскерлік басқару магистрі (MBA) дәрежесімен бітірді.

    Еңбек жолын 2005 жылы «Алматы құс» ААҚ («Сеймар» тобы) компаниясының бөлшек сауда директоры қызметінен бастады.

    2007 жылғы ақпан-2010 жылғы шілде-Procter & Gamble компаниясының бас логистикалық үйлестірушісі.

    2010 жылғы шілде-2012 жылғы қараша – «Eastcomtrans» ЖШС жылжымалы құрамды жалдау бөлімінің бастығы.

    2012 жылғы қараша-2018 жылғы мамыр – «Ақ ниет» ЖШС Бас директоры.

    2018 жылғы қараша-2019 жылғы сәуір – «Ақ ниет» ЖШС Байқау кеңесінің мүшесі.

    2019 жылғы сәуір-2023 жылғы наурыз-Aq niet Group Байқау кеңесі төрағасының орынбасары.

    2023 жылғы 29 наурыздан бастап – «Respublica» партиясының партиялық тізімі бойынша VIII сайланған Қазақстан Республикасы Парламенті Мәжілісінің депутаты, Қаржы және бюджет комитетінің мүшесі. 2023 жылғы наурыздан бастап VIII сайланған Қазақстан Республикасы Парламенті Мәжілісінің депутаты «Respublica» партиясының партиялық тізімі бойынша сайланды.

    2022 жылы Қазақстан Республикасының әлеуметтік-гуманитарлық дамуындағы ерекше жетістіктері, белсенді қоғамдық қызметі, мәдениетті дамытуға қосқан ерекше үлесі үшін « Қазақстанның Еңбек ер» атағы – үздік дәрежесі берілді.

  • Павлодар облысында қарт кісі үйімен бірге өртеніп кетті

    Павлодар облысында қарт кісі үйімен бірге өртеніп кетті

    Павлодар облысында қарт кісі үйімен бірге өртеніп кеткені белгілі болды. Облыстық Төтенше жағдайлар департаменті таратқан мәліметке сүйенсек, оқиға 23 ақпан күні сағат 11:28-де Железинка ауданының Михайловка ауылында болған.

    «Жекеменшік тұрғын үйде тұрмыстық газ баллонды қауіпсіз пайдалану талаптарын бұзу нәтижесінде газ-ауа қоспасының жануы орын алып, 70 шаршы метр алаңды өрт шарпыды.

    Өрт орнына жедел түрде 16-ӨСБ өрт сөндірушілері жіберілді (өрт сөндіру бөлімінен 98 км қашықтықта орналасқан), сонымен қатар Михайловка ауылының жергілікті атқарушы органдарының өрт сөндіру бекеті жұмыс жүргізді. Жергілікті атқарушы органдардың өрт сөндіру бекетінің күшімен (4 адам және 1 техника) 1959 жылы туған үй иесінің денесі табылды.

    Сағат 14.00-де өрт толықтай сөндірілді. ТЖД күштері мен құралдарынан 3 қызметкер және 2 бірлік техникасы, сонымен қатар ЖАО 4 адам және 1 техника жұмылдырылды», – делінген ТЖД хабарламасында.

    Павлодар облысының ТЖД өрт қауіпсіздігі шараларын қатаң сақтау туралы ескертеді.

  • Қызылорда облысында шетелдіктерді елге заңсыз тартқан күдікті топ ұсталды

    Қызылорда облысында шетелдіктерді елге заңсыз тартқан күдікті топ ұсталды

    Қызылорда облысының Байқоңыр қаласында заңсыз көші-қонды ұйымдастырған күдікті бір топ адам қолға түсті.

    Алдын ала деректер бойынша, олар жақын шетел азаматтарына Қазақстанда уақытша тұруға 80-нен астам заңсыз рұқсат ресімдеген.

    «Тінту барысында заттай дәлелдемелер тәркіленген. Қылмыстық кодекстің 251-бабының 1-бөлігі, 394-бабының 2-бөлігі және 366-бабының 1-бөлігі бойынша сотқа дейінгі тергеп-тексеру жүргізіліп жатыр.

    Қылмыстық-процестік кодекстің 201-бабының 1-бөлігіне сәйкес өзге ақпарат жария етуге жатпайды», – делінген ҰҚК хабарламасында.