Sona.kz

Рубрика: Жаңалықтар

  • 25 % айлығымызды қиып тастады: Алатаулық ұстаздар бас көтеріп жатыр

    25 % айлығымызды қиып тастады: Алатаулық ұстаздар бас көтеріп жатыр

    Алматы облысында жаңадан құрылған Алатау қаласының ұстаздары бас көтеріп жатыр. Көпшіліктің айтуынша, олардың айлығын 25 пайызға қысқартып тастаған. Осы жайтқа наразы мұғалімдер Президент Қасым-Жомарт Тоқаевқа үндеу жариялап, көмек сұрап жатыр. Сондай-ақ, дәл осы мәселенің әділ шешілуіне Оқу-ағарту министрі Ғани Бисембаев пен Мәжіліс депутаттары да араласса  дейді, ұстаздар  қауымы.

    Алатаулық ұстаздардың наразылығына қаланың білім бөлімі жазбаша былай деп жауап берді.

    «2024 жылғы 1 қазанда Алатау қаласындағы №1 және №47 мектептерінің педагогикалық ұжымдары жергілікті мемлекеттік органдар өкілдерімен кездесті. Бұған дейін аталған мектеп ұжымдары әкімшілік-аумақтық құрылыстың өзгеруіне байланысты жалақы мөлшерінің өзгеруіне қатысты алаңдаушылықтарын білдірген болатын.

    Естеріңізге сала кетейік, 2024 жылғы 9 қаңтардан бастап Алатау қаласының құрамына бұрын Алматы облысының Қонаев қаласына, Іле және Талғар аудандарына қарасты бірқатар елді мекендер енгізілді. Осыған орай, қолданыстағы заңнамаға сәйкес, аталған аумақтарда тұратын бюджет саласы қызметкерлерінің еңбекақы төлеу жүйесінде өзгерістер орын алды», — делінген Алатау қаласы Білім бөлімінің баспасөз қызметінің хабарламасында.

    Сондай-ақ, ведомство қызметі туындаған мәселелерді жан-жақты қарау мақсатында кездесуге Алатау қаласы әкімінің орынбасары, қалалық білім бөлімінің басшысы, сондай-ақ облыстық білім және ішкі саясат басқармаларының өкілдері қатысқанын жеткізді.

    «Нәтижелі диалог барысында еңбекақы төлеу мәселелерімен қатар, тұрғындардың өзекті мәселелері — көлікпен қамтамасыз ету, қоқыс шығару, газбен жабдықтау мәселелері де талқыланды. Кездесу қорытындысы бойынша педагогикалық ұжымдармен өзара түсіністікке қол жеткізілді», — деп толықтырды аталған ведомствоның баспасөз қызметінен.

  • Иран Израиль аумағын 200-ге жуық зымыранмен атқылаған

    Иран Израиль аумағын 200-ге жуық зымыранмен атқылаған

    Иран сейсенбінің кешінде Израиль аумағына 200-ге жуық зымыран жіберген. Ислам республикасының билігі Израильдің тек әскери нысандарына оқ жаудырғанын мәлімдеді. Бұған қоса кең ауқымды соғысты қаламайтынын жеткізді. Ислам революциясы сақшыларының корпусы, Хамас лидері Исмаил Хания мен «Хезболла» лидері Хасан Насралланың өлімі үшін кек алу мақсатында Израильге соққы бергенін мәлімдеді. Ал Израиль кек қайтарған жағдайда, Тегеран жойқын шабуылмен жауап беретінін де ескертті. Иранның ракеталарын Израиль АҚШ-тың эсминец кемелерінің көмегімен атып түсірген. Премьер-министр Биньямин Нетаньяху Иран Израиль аумағын баллистикалық зымырандармен атқылап, үлкен қате жібергенін және сол үшін жауап беретінін мәлімдеді. Тегеранның шабуылынан кейін Израиль әскерилері «Хезболла»-ның Бейруттегі нысандарына соққы берген.

  • Өңірлерде жылыту маусымы басталды

    Өңірлерде жылыту маусымы басталды

    Энергетика министрлігінің мәліметінше, Қазақстанның Бірыңғай электр энергетикалық жүйесі Ресей Федерациясының және Орталық Азия елдерінің энергетикалық жүйелерімен қатарлас жұмысын жалғастыра отырып, қалыпты режимде жұмыс істейді.

    Қазіргі таңда 4 энергоблокта, 22 қазандықта және 16 турбинада жөндеу жұмыстары жүргізілсе, 5 энергоблоктың, 32 қазандықтың және 28 турбинаның жөндеу жұмыстары аяқталған.

    «Барлық электр станциялары жылыту маусымының басталуына дайын, негізгі жабдықтармен, соның ішінде қазандықтармен және турбиналармен қамтамасыз етілген. 2024 жылы АЭК-тің (электр желілерін тарату компанияларының) электр желілерінде 20,8 мың км электр беру желілерін, 422 қосалқы станцияны және 4054 тарату пункттері мен трансформаторлық қосалқы станцияларды жөндеу көзделген. Қазірдің өзінде 19,9 мың км электр желілері, 376 қосалқы станция және 4046 тарату пункті мен трансформаторлық қосалқы станциялар жөнделді» делінген хабарламада.

    Айта кетейік, жылумен қамту саласында 2024 жылы 546 км жылу желілерін күрделі жөндеу және жаңғырту жоспарланған. Қазіргі уақытта 516,3 км жылу желілері жөнделген, бұл жылдық жоспардың 94,6% құрайды.

    2024 жылғы 11 қыркүйекте кезекті кеңес өткізілген, оның қорытындысы бойынша жөндеу жұмыстарын уақытылы аяқтау, отынның нормативтік қорын сақтау және энергетикалық жабдықтарды пайдалануды бақылауды күшейту жөнінде тапсырмалар берілген еді.

    Сонымен қатар алдағы жылыту маусымына дайындық барысы 2024 жылғы 20 тамыздағы Үкімет отырысында талқыланды. Барлық мәселелер бойынша тиісті шешімдер қабылданған.

  • Жолбарыстардың бейімделуіне бір жылдай уақыт кетеді

    Жолбарыстардың бейімделуіне бір жылдай уақыт кетеді

    Қазақстанға Нидерландыдан әкелінген жолбарыстардың бейімделуіне бір жылдай уақыт кетеді. Бұл туралы биоценология және аңшылықтану зертханасының меңгерушісі Константин Плахов айтты. Қазір Мысықтұқымдас жануарлар Алматы облысындағы 415 мың гектар жерді қамтитын «Іле-Балқаш» резерватында жүр. Зоологтың айтуынша, «Тұран» жолбарысы популяциясын қайтаруға мүмкіндік мол. Ол үшін барлық жағдай жасалған. Жануарды көбейтуге халықаралық жолбарыстарды қорғау қауымдастығы да баса назар аударып отыр. Маманның дерегінше, Бақанас тұрғындары жолбарыстың іздерін соңғы рет 1951 жылы көрген. Ал, жануардың жойылуына жергілікті тұрғындар мен броканерлер себеп болды, дейді. Бірінші дерек — жолбарыстардың азығын тартып алса, екінші факт — жануарларды сатып жіберу.

    «Қауіпсіздік мәселесі үнемі көтеріліп жүрген тақырып. Әрине, бұл жерге жақын жерде ешқандай ауыл жоқ. Тұрғындар резерваттан тыс жерде қоныстанған. Қазір жолбарыстар жүрген аумаққа ешкім бара алмайды. Мамандар қауіпсіздікті қатаң бақылап отыр. Ал, жануарларды көбейту мәселесіне келер болсақ, нақты болжам айту қиын. Әуелі жолбарыстар тоғайға бейімделіп, жерсінуі керек. Әлі оларды табиғатқа босатқан жоқ. Бейімделуге шамамен бір жыл кетуі мүмкін. Оған жолбарыстардың қай елден әкелінгені, жасы да әсер етеді», — деді ҚР ҒЖБМ «Зоология институты» биоценология және аңшылықтану зертханасының меңгерушісі КОНСТАНТИН ПЛАХОВ.

  • Есірткіні шприцке тыққан ер адам ұсталды

    Есірткіні шприцке тыққан ер адам ұсталды

    Басқа біреудің мүлкін ұрлаған деген күдікпен қамауға алынған тергеудегі азаматтың ағасы есірткі затты тығып өткізуге тырысты. Алайда, тергеу изоляторы қызметкерлерінің қырағылығының арқасында есірткі заттар сусабын бөтелкесінен табылды.

    Ер адам алдын-ала 200 мл шприцке есірткіге ұқсас жасыл заттарды салып, оларды сусабынның ішіне жасырып өткізбек болды. Тыйым салынған заттар тәркіленіп, химиялық сот сараптамасына жіберілді.

    «Тыйым салынған заттарды беру фактісі бейнетіркеуішке тіркелді. ҚАЖ мекемелеріне есірткі заттарын өткізу оларды сату ретінде сараланады, яғни бас бостандығынан айыруға жазаланатын қылмыстық-жазаланатын әрекеттердің бірі болып табылады»,- деп атап өтті өңірлік ҚАЖД бастығының міндетін атқарушы Бақытжан Шәріпбеков.

    Айта кетейік, оқиға Алматы және Жетісу облыстары бойынша ҚАЖ департаментінің №71 мекемесінде болған.

  • Референдум күні: бас санитар дәрігер сақтық шаралары туралы айтты

    Референдум күні: бас санитар дәрігер сақтық шаралары туралы айтты

    Бас мемлекеттік санитар дәрігер Сархат Бейсенова Орталық референдум комиссиясының отырысында 6 қазанда қандай эпидемиологиялық шаралар қолдану керегін айтты.

    Ол референдум кезінде коронавирус, жіті респираторлық инфекция мен тұмаудың алдын алу үшін сайлау учаскелерін желдетіп, тазалап тұру керек дейді.

    «Елімізде коронавирус инфекциясы бойынша эпидемиологиялық жағдай тұрақты. 2024 жылдың басынан бастап коронавирус жұқтырған 1676 адам тіркелді. Өлім жағдайы жоқ. Былтырдың осы кезеңімен салыстырғанда коронавирус жұқтырғандардың саны 7 есеге азайған. Биыл қыркүйекте 252 адам тіркелді. Бұл өткен жылғы көрсеткіштен екі есе аз», – дейді Бейсенова.

    Оның айтуынша, қыркүйек айында  544 мың адамнан жіті респираторлық инфекция табылған.

    «Тұмау жағдайы тіркелмеген. Науқастарға көмек көрсету бойынша вакцина сатып алынды. Бүгінгі таңда халық егіліп жатыр. Референдум кезінде учаскелердегі адамның көбеймеуін қамтамасыз етіп, ауаны тазалап тұру керек. Учаскелерде ылғалды тазалық жүргізген абзал», – деді Бейсенова.

  • Қазақстандық шахматшылар әлемдік рейтингті жаңартты

    Қазақстандық шахматшылар әлемдік рейтингті жаңартты

    Шахматтан Қазақстан құрамасының мүшелері жасөспірімдер арасында әлемдік рейтингінің топ-20-лығында бірден бес орынды иеленді, деп хабарлады 1bol.kz.

     Жасөспірімдер арасында үздік жиырмалыққа Бибісара Асаубаева, Меруерт Камалиденова, Ксения Балабаева, Алуа Нұрман және Лия Құрманғалиева енген.

    Алғашқы жиырмалыққа Үндістанның төрт өкілі мен екі қытайлық шахматшы ілікті. Одан бөлек ұлттық құрама көшбасшысы Бибісара Асаубаева әйелдер арасында әлемдік рейтингіде 16-орынға тұрақтады.

    Айта кетейік, Қазақстанның әйелдер құрамасы Будапеште өткен шахмат Олимпиадасында күміс жүлдегер атанды. Құрама намысын Бибісара Асаубаева, Меруерт Камалиденова, Ксения Балабаева, Алуа Нұрман және Әмина Қайырбекова қорғады.

  • Елімізде ауа райына байланысты ескерту жасалды

    Елімізде ауа райына байланысты ескерту жасалды

    Қарағанды облысында солтүстік-шығыстан соғатын жел солтүстік-батысқа ауысады, күндіз облыстың батысында, солтүстігінде екпіні 15-20 м/с. Облыстың басым бөлігінде жоғары өрт қаупі, облыстың батысында, шығысында төтенше өрт қаупі сақталады.

    Ақтөбе облысында солтүстік-шығыстан жел соғады, облыстың солтүстігінде, шығысында, орталығында екпіні 15-20 м/с күтіледі. Облыстың солтүстігінде, солтүстік-шығысында жоғары, басым бөлігінде төтенше өрт қаупі сақталады.

    Қызылорда облысының басым бөлігінде төтенше өрт қауіпі, облыстың солтүстік-батысында жоғары өрт қаупі сақталады.

    Қостанай облысының солтүстік-шығысында жел соғады, облыстың батысында, оңтүстігінде, шығысында екпіні 15-20 м/с күтіледі. Облыстың оңтүстігінде жоғары өрт қаупі сақталады.

    Шығыс Қазақстан облысының солтүстігінде, батысында, оңтүстігінде, орталығында жоғары өрт қаупі сақталады.

    Абай облысында оңтүстік-шығыстан соғатын жел солтүстік-батысқа ауысады, күндіз облыстың солтүстігінде, орталығында 15-20 м/с күтіледі. Облыстың солтүстігінде, шығысында, орталығында жоғары өрт қауіпі сақталады, облыстың оңтүстігінде төтенше өрт қаупі сақталады.

    Астанада күндіз солтүстік-шығыстан жел соғады, кей уақыттарда екпіні 15-20 м/с.

    Маңғыстау облысының батысында, оңтүстігінде найзағай күтіледі. Оңтүстік-шығыстан солтүстік-батысқа ауыспалы жел соғады, күндіз облыстың батысында, оңтүстігінде 15-20 м/с күтіледі. Облыстың басым бөлігінде төтенше өрт қаупі, облыстың шығысында жоғары өрт қаупі сақталады.

    Ақмола облысының батысында, оңтүстігінде, шығысында солтүстік-шығыстан жел соғады, екпіні 15-20 м/с күтіледі.

    Батыс Қазақстан облысының солтүстік-шығысында, шығысында жел солтүстік-шығыстан, шығыстан соғады, екпіні 15-20 м/с. Облыстың солтүстігінде жоғары өрт қауіпі сақталады, облыстың басым бөлігінде төтенше өрт қаупі сақталады.

    Атырау облысының басым бөлігінде төтенше өрт қаупі сақталады.

    Түркістан облысының оңтүстігінде, таулы және тау бөктерлі аудандарында найзағай күтіледі. Шығыстан, оңтүстік-шығыстан жел соғады, облыстың тау асуларында күші 15-20 м/с. Облыстың басым бөлігінде төтенше өрт қауіпі (5 класс) сақталады.

    Шымкентте түнде және таңертең найзағай күтіледі. Төтенше өрт қауіпі (5 класс) сақталады.

    Солтүстік Қазақстан облысының батысында тұман күтіледі. Солтүстіктен жел соғады, түнде облыстың оңтүстік-батысында, күндіз облыстың оңтүстігінде, батысында, шығысында екпіні 15-20 м/с.

    Павлодар облысының батысында, оңтүстігінде жел солтүстіктен соғады, екпіні 15-20 м/с күтіледі.

    Жамбыл облысының оңтүстігінде, таулы аудандарында найзағай күтіледі. Түнде және таңертең облыстың таулы аудандарында тұман күтіледі. Солтүстік-батыстан соғатын жел солтүстік-шығыс желіне ауысады, облыстың таулы аудандарында, облыстың солтүстік-шығысында, таулы аудандарында 15-20 м/с күтіледі. Облыстың басым бөлігінде төтенше, облыстың оңтүстік-шығысында жоғары өрт қаупі сақталады.

  • Бельгиялықтар ереуілдетіп жатыр: әуе рейстері тоқтап, 40 мың адам жолдан қалды

    Бельгиялықтар ереуілдетіп жатыр: әуе рейстері тоқтап, 40 мың адам жолдан қалды

    Бельгияда  әуежай қызметкерлері ереуілдетіп жатыр.  Салдарынан әуе рейстері тоқтады.  40 мыңнан астам адам жолдарынан қалды. Ал, наразылық білдірушілер қатарында әуежайда жұмыс істейтін тазалықшыдан бастап, түрлі қызмет көрсету саласының мамандары бар. Олар жалақының алдығына қарсылық білдіріп, табыстарын  көбейтуді талап етуде. Осы ереуілдің кесірінен бүгін Брюссель және Шарлеруа қаласының әуежайынан ұшуы тиіс барлық рейс кейінге шегерілді. Жолаушылар бүгін әуежайға түнеуге мәжбүр.

     

  • Астанаға отыз бір елден мәнерлеп сырғанаушылар жиналады

    Астанаға отыз бір елден мәнерлеп сырғанаушылар жиналады

    3-5 қазан аралығында «Барыс Арена» спорт кешенінде мәнерлеп сырғанаудан «Denis Ten Memorial Challenge 2024» V Халықаралық турнирі өтеді.

    Турнирге 31 елден 120-ға жуық спортшы қатысады, олардың арасында Диас Жиренбаев (Қазақстан), Даниэль Грассль (Италия), Анастасия Губанова (Грузия), Старр Эндрюс (АҚШ), Алекса Ракич (Канада), Йе Куан және Ханна Лим (Оңтүстік Корея) және басқалары бар.

    Жарыс ересектер мен жасөспірімдер арасында екі санатта өтеді – жеке конькимен сырғанау және мұз биі.

    3 және 4 қазан күндері сағат 11.00-ден 20.00-ге дейін көрерменге кіру тегін. 5 қазан күні сағат 19.30-да марапаттау рәсімі мен гала-шоу өтеді. Гала-шоуға кіру билеттер бойынша жүргізіледі.

    Жарыстың кестесі ұйымдастырушының, яғни «Денис Тен қоры» қоғамдық қорының @denistenfoundation ресми парақшасында жарияланады.