Sona.kz

Рубрика: Қазақстан жаңалықтары

  • Астанада 5 жастағы баланың бетін тілген жасөспірім қайда?

    Астанада 5 жастағы баланың бетін тілген жасөспірім қайда?

    Бала құқықтары жөніндегі уәкіл Динара Закиева Астанада психикалық денсаулығы нашар жасөспірімнің 5 жастағы балаға шабуыл жасаған оқиғаға қатысты пікір білдірді. 

    Динара Закиева жасөспірімнің қазір қайда екенін айтты.

    «Кеше аймақтық комиссармен бірге жәбірленуші балаға барып, жағдайын білдік. Баланың жағдайы тұрақты, барлық қажетті көмек көрсетілуде. Сондай-ақ, Астана бойынша өңірлік уәкіл А. Т. Бимендина баланың анасымен үнемі байланыста отыр. Ал шабуыл жасаған бала денсаулық сақтау жүйесінің мекемесіне орналастырылды. Баланың анасы жауапкершілікке тартылды», — деді бала құқықтары жөніндегі уәкіл.

    Оның айтуынша, қазіргі уақытта тергеу амалдары жүргізіліп жатыр.

    Еске салайық, Астанада психоневрологиялық диспансерде есепте тұрған жасөспірім лифтте баланың бетіне пышақ жарақатын салған еді. Қазіргі таңда зардап шеккен бала ауруханаға жатқызылды, оған қажетті медициналық көмек көрсетіліп жатыр.

     

  • Қазақстанда айыппұл төлеуде 50% жеңілдік алынып тасталуы мүмкін

    Қазақстанда айыппұл төлеуде 50% жеңілдік алынып тасталуы мүмкін

    Сенатор Марат Қожаев өзінің депутаттық сауалында айыппұл арқылы ережені қайта бұзумен күрес мүмкін еместігін айта келіп, соңғы кезде жол жүрісі қағидаларының бұзылуы көбейе түскеніне тоқталды.

    «Техникалық құралдар Жол жүрісі қағидаларын бұзудың негізгі бөлігін автоматты түрде тіркейді, қазіргі кезде ол ережені бұзудың саны 3 708 084 болып отыр. Ережені жүйелі түрде бұзудың алдын алуға қолданыстағы құқық қолдану тәжірибесі мүмкіндік бермейді. Өйткені техникалық құралдар автоматты түрде тіркеген жүргізушіні ережені қайта бұзғаны үшін жауапқа тарту мүмкін емес. Себебі, көлік құралының иесіне ереже бұзудың тарихы ескерілмей айыппұл жазылады. Сондай-ақ, жол қозғалысы ережесін жүйелі түрде елемейтін, жол тәртібін қасақана бұзушыларға Жол жүрісі қағидалары бойынша емтиханды қайта тапсыруды міндеттеу мүмкін емес. Сонымен қатар, техникалық құралдар ережені бұзу дерегін ғана тіркейді, бірақ жүргізушінің дайындық деңгейін және оның жол ережесін өрескел бұзу мен қауіпті әрекетке бейімділігін бағалауға мүмкіндік бермейді», – деп атап өтті сенатор.

    Сенатор сондай-ақ кейбір жоғары төлем төлеуге қабілетті жүргізушілер айыппұлды жауапкершіліктен қашудың әдетке айналған тетігі ретінде түсінуіне алаңдаушылық білдірді. Алматыда көлік құралының бір жүргізушісі бір жылда үш миллион теңгеден астам сома айыппұл төлеп, 143 бұзушылық жасаған жағдай тіркелген көрінеді.

    «Әсіресе техникалық құралдар тіркеген ереже бұзу дерегі бойынша жүргізушілердің жауапкершілігін күшейту мәселесін қарауды ұсынамыз. ӘҚБтК-дегі өзгерістерде техникалық құралдар тіркеген 10 және одан да көп бұзушылығы бар жүргізушілерді Жол жүрісі қағидалары бойынша теориялық емтиханды қайта тапсыруға жіберуді міндетті ету маңызды. Жүргізуші куәлігінен уақытша айыруға дейін камералармен тіркелген жол қозғалысы ережесін қайталап бұзғаны үшін жауапкершілікті күшейту қажет. Заң талабын бұзушыларға белгілі бір кезеңдегі тәртіп бұзу санын ескеретін сараланған жаза тетігін әзірлеу және ережені жүйелі түрде бұзушыларға айыппұл төлеуде 50% жеңілдікті алып тастау маңызды», – деді депутат.

    Сенатор алдын алу жұмысын күшейту үшін мұндай жүргізушілерді сынақты қайта тапсыруға жіберуді, сондай-ақ қажет болған жағдайда оларды жүргізуші куәлігінен айыруды ұсынды.

  • Төтенше жағдайлар департаменті ауа райына байланысты ескерту жасады

    Төтенше жағдайлар департаменті ауа райына байланысты ескерту жасады

    Оңтүстік-батыстан жел соғады, күші 15-20, күндіз екпіні 23-28 м/с болуы мүмкін. Осыған байланысты елордалық ТЖД қауіпсіздік ережесі туралы үндеу жасады, – деп хабарлайды қала әкімдігінің ресми сайты.

    Ауа райының қолайсыздығына байланысты Астана қаласы ТЖД қатты жел және бұрқасын кезінде жарақат алмау үшін азаматтарға қауіпсіздік шараларын сақтауды ұсынады:

    – Қыс мезгілінде сақтық шараларын сақтаңыз. Дауылды ескертулерді қадағалау және ауа райы нашарлаған жағдайда алыс жолға шықпау.

    – Жеке көлікпен жолға шықпаңыз. Егер қажет болса, қоғамдық көлікті пайдаланыңыз және маршрутыңызды алдын ала жоспарлаңыз.

    – Көшеде абай болыңыз. Боран мен жел көруді қиындатуы мүмкін, жолдар тайғақ болады. Жылы киім, тайғақтан қорғайтын аяқкиім киіңіз.

    – Жылыту жүйесін тексеріңіз. Үйіңізде жылыту дұрыс жұмыс істейтініне және отын жеткілікті екеніне көз жеткізіңіз.

    – Көшеде ұзақ тұрмаңыз – аяз бен жел үсік шалуға себеп болуы мүмкін.

    Төтенше жағдайлар кезінде «101» және «112» нөміріне хабарласыңыз.

  • Алматы әкімінің бұрынғы орынбасары Ержан Бабақұмаров 15 тәулікке қамалды

    Алматы әкімінің бұрынғы орынбасары Ержан Бабақұмаров 15 тәулікке қамалды

    Алматы әкімінің бұрынғы орынбасары Ержан Бабақұмаров 15 тәулікке қамауға алынып, 7 жылға жүргізуші куәлігінен айырылды.

    Астана қаласының әкімшілік құқық бұзушылықтар жөніндегі мамандандырылған ауданаралық соты Ержан Бабақұмаровты Әкімшілік құқық бұзушылық кодексінің 608-бабының 1-бөлігі бойынша 15 тәулікке қамап, 7 жылға жүргізуші куәлігінен айырды.

    Белгілі болғандай, 29 қаңтарда Астанада полиция оның Toyota Land Cruiser Prado көлігін тоқтатып, Бабақұмаровтың жеңіл дәрежедегі мас күйінде рульде болғанын анықтады.

    Айта кетейік, Ержан Бабақұмаров – «Орталық коммуникациялар қызметінің» бұрынғы директоры, экс-президент кеңесшісі және Алматы қаласы әкімінің бұрынғы орынбасары.

  • Жынысына қатысты дау тудырған боксшы IBA-ны сотқа берді

    Жынысына қатысты дау тудырған боксшы IBA-ны сотқа берді

    IBA алжирлік боксшының Олимпиадада әділетсіз чемпион болғанын мәлімдеген. Оқиғаны әріден бастасақ. Жынысына байланысты бокс әлемінде дау туындаған Иман Хелиф 2023 жылы әлем чемпионатында гендерлік тест тапсырып, оның ағзасынан ер адамға ғана тиесілі XY-хромомсомалары анықталған болатын. IBA оны сол жылы әлем чемпионатына қатысу құқығынан айырса да, бір жылдан соң Олимпиада чемпионы атанды.

    Қазіргі уақытта IBA ХОК-тың үстінен Швейцария бас прокуратурасына шағымданған. Ал Иман Хелиф «жеке өміріме қол сұқты» деп IBA-ны сотқа берген.

    – Менің енді Халықаралық бокс қауымдастығына ешқандай қатысым жоқ. Есесіне бұл ұйымды Халықаралық Олимпиада комитеті де мойындамайды. Бірақ, олар тағы да жалған және агрессивті айыптаулар жасап, өз мүдделерін ілгерілетуге тырысып жатыр. Бұл – тек менің ғана емес, жалпы спорттағы адалдық мәселесі. Менің командам жағдайды мұқият зерттеп, заңды құқықтарымды қорғау және әділ бәсекенің сақталуы үшін барлық қажетті қадамды жасап келеді. Жауапты тұлғалар өз әрекеті үшін жауап беруі тиіс. Біз әділдік үшін барлық мүмкін заңды құралды қолданамыз, – деп жазды алжирлік боксшы әлеуметтік желіде. 

    Ресейлік Умар Кремлев басқаратын IBA ұйымы Иман Хелифтің бұл әрекетіне еш таңғалмайтынын, қайта қуанатынын жеткізген. Өйткені, ол сотта боксшыны гендерлік тесттен өткізіп, шынайы жынысын бүкіл әлемге танытуға білек сыбанып отыр.

  • Досаев Алматыда ауыз су тарифінің не үшін көтерілгенін айтты

    Досаев Алматыда ауыз су тарифінің не үшін көтерілгенін айтты

    Алматы әкімі Ерболат Досаев  су бағасы неге күрт қымбаттап кеткенін түсіндірмек болды. Оның айтуынша, сараланған тарифтер енгізілген. Оған сәйкес, су үнемдей алмайтын адамдар қымбатырақ төлейді.

    Қала тұрғыны коммуналдық төлемдердің күрт қымбаттап кеткенін, соның ішінде суға тарифтердің үш есе көтерілгенін айтты.

    «Бұл тарифті пенсиядағы адамдар қалай төлеуі керек? Не себепті баға күрт көтеріліп кеткенін түсіндірсеңіз», – деді зейнеткер.

    Қала басшысы тұтынған су көлеміне қарай сараланған тарифтер енгізілгенін мәлімдеді. Досаев сараланған тарифтер қала тұрғындарын суды үнемдеуге үйрететініне сенімді.

    «Біз сараланған тарифтерді енгізді. Біз әр адам шамамен қанша көлемде су тұтынатынын есептеп, орташа тұтыну көлемін шығардық. Алматы тұрғындары суды үнемдеуі керек. Бізде суды үнемдеуге қатысты мәселе әлі де шешімін тапқан жоқ. Суды үнемдеп, қажетіне қарай жарататын адамдарға біз бекіткен нормалар молынан жетеді. Су біздің басты байлығымыз», – деді әкім.

    Досаев суды өшіруді ұмытып кететін, есік алдындағы бақты ауыз сумен суғаратын адамдар бар екенін, солар үшін коммуналдық төлемдер артатынын айтады.

    Сондай-ақ қалада су тапшылығын болдырмау мақсатында жер асты су қорын барлау жұмыстары жүргізіліп жатқанын да атап өтті.

    «Алматыда су қоры бар. Бірақ соның өзінде біз оны үнемдеп пайдалануымыз керек», – деді ол.

  • Республикалық маңызы бар екі жол ауа райына байланысты жабылды

    Республикалық маңызы бар екі жол ауа райына байланысты жабылды

    Ауа райының күрт құбылуына байланысты Астанаға апаратын екі республикалық маңызды жол уақытша жабылды. Бұл туралы «ҚазАвтожол» хабарлады.

    Ақпаратқа сүйенсек, Павлодарға және Петропавлға баратын екі жол Ақмола облысы аумағында жабылған.

    «2025 жылғы 13 ақпан сағат 08:00-де Ақмола облысында ауа райының бұзылуына байланысты «Астана-Ерейментау-Шідерті» 16-200 ш, Астана қ. уч. – Павлодар облысы шекарасына дейін көліктің барлық түрінің қозғалысына шектеу қойылады», – делінген ҚазАвтожол хабарламасында.

    Бұл автожолдың Ақмола облысы шекарасынан Павлодар облысындағы Шідерті кентіне дейінгі аумағына да шектеу қойылған. «ҚазАвтожол» ақпаратына сүйенсек, жолдарды 13 ақпан кешкі сағат 17:00-де ашу жоспарланған.

    Төтенше жағдайлар министрлігі солтүстікте ауа райының күрт суып кетуіне байланысты ескерту жариялап, тұрғындандар алыс сапарға шықпауды сұрады.

  • Жамбыл облысында 22 жастағы полицей өзін тапаншамен атқан

    Жамбыл облысында 22 жастағы полицей өзін тапаншамен атқан

    Қайғылы оқиға 12 ақпан күні, кешкі сағат 18:15 шамасында Жасөркен ауылында болған. Кейбір ақпарат көздерінің хабарлауынша, Мамандандырылған күзет қызметі басқармасы сержанты қызметтік тапаншасымен өзінің басынан атқан.

    Оқиға орнына полиция департаменті, мамандандырылған күзет қызметі басқармасы және жедел тергеу тобы жетекшілері келіп, мән-жайды анықтауға кірісті.

    Осы оқиғаға байланысты өзін-өзі өлтіруге итермелеу бабы бойынша сотқа дейінгі тергеу басталды. Тергеудің толықтығын, объективтілігін және жан-жақтылығын қамтамасыз ету үшін барлық қажетті жедел-іздестіру шаралары жүргізілуде.

    Қазақстан Республикасы Қылмыстық-процестік кодексінің 201-бабына сәйкес өзге де мәліметтер тергеу мүддесі үшін жария етілуге ​​жатпайды.

     

  • Жағажайдағы ескі-құсқының көзін жоятын кез келді – Асхат Бердіханов

    Жағажайдағы ескі-құсқының көзін жоятын кез келді – Асхат Бердіханов

    Қонаевтағы 6,7-ші жағажайларды жаңартып, жаңғыртатын уақыт келді. Бұл туралы кәсіпкерлермен кездескен қала әкімі Асхат Бердіханов айтты.

    Баршаға мәлім, 2024 жылы №5 жағажай қолданысқа берілді. Қазір «Фридом финанс» компаниясы 1 шақырым жағажайды абаттандырып жатыр. Құрылысы жақын арада аяқталады деп жоспарланған. Сондай-ақ құрылыс жұмыстары №8 жағажайда да жүріп жатыр. Алдағы уақытта 5 шақырымнан астам жағажайды абаттандыру, Солтүстік жағажайларды да кезең-кезеңімен дамыту көзделуде.

    Енді жуық арада 6,7-ші жағажайды абаттандырып, қолданысқа беру қажеттілігі туындап отыр. Себебі, шомылу маусымында осы қалалық жағажайға келіп, демалатын адамдардың саны басқа орындармен салыстырғанда айтарлықтай көп. Туризмді дамыту, демалушыларға қолайлы орта құру, қызмет көрсету сапасын жоғарылату – әкімдіктің басты міндеттерінің бірі. Жағажайды абаттандыру – инвестициялық тартымдылықты арттыру, облыс орталығының сәулеттік келбетін жақсарту үшін де таптырмас мүмкіндік.

    Мұндағы бизнес орындарының қазіргі жағдайы көңіл көншітпейді: қираған темір жабдықтар, қоқыс толған аумақтар, тапшандар.

    Бұған дейін бірнеше жыл қатарынан мұнда 42 кәсіпкер қызмет еткен. Олар коммуналдық мемлекеттік мекемемен келісімшартқа отырып, арзан бағада бизнес орындарын жалға алып әрі ағымдағы жөндеу ғана жасап отырған. Енді ол заман келмеске кетті, – дейді әкім.

    Мәселені түбегейлі шешу үшін әкімдіктің дөңгелек үстелінде «Қонаев әлеуметтік-кәсіпкерлік корпорациясы» АҚ-ның өкілдері, бөлім басшылары, кәсіпкерлер жиналды.

    «Жыл басында аумағы 7,5706 гектар жағажай«Қонаев әлеуметтік-кәсіпкерлік корпорациясы» АҚ-ға 10 жылға уақытша пайдалануға берілді. Енді корпорация жағажайды жаңғыртуға белсене кіріспек ниетте», — деді Асхат Бердіханов.

    Ал корпорация мамандары кәсіпкерлерге керемет мүмкіндіктер ұсынды:

    1. Егер құрылыс корпорация қаржысына ғана жүргізілсе, абаттандыру толық аяқталған соң, сенімгерлік басқарушы компания бизнес орындарын жалға алуға конкурс өткізеді. Оған кез келген кәсіпкер қатысуына болады;

    2. Егер құрылысқа кәсіпкерлер өздері қаржы құйса, нысанды бірден бірнеше жыл жалға алуға мүмкіндік қарастырылады.

    Кәсіпкерлер әлі де бұл мәселені талқылау қажеттілігін жеткізді. Олар құрылыстың қымбатқа соғатынын алға тартты.

    «Жағажайды жөндеуге инвестор тартсақ, жаңа жұмыс орындары құрылғанымен, басқа кәсіпкерлердің жұмысы тоқтап қалады. Сондықтан шағын және орта бизнес өкілдерін қолдау мақсатында «Қонаев ӘКК» АҚ-мен серіктес болуға шешім қабылдадық», — деді әкім.

    Сонымен қатар ол былтыр шомылу маусымында қалаға 1,5 млн демалушы келгенін айтты.

    «Биыл көрсеткішті жоғарылату қажет. Ол үшін жағалауларды заманауи әрі көрікті етсек артық болмайды», — деді Асхат Бердіханов сөзін қорытындылап.

    Аталған мәселеге байланысты қосымша ақпараттар алдағы уақытта жарияланатын болады.

  • Астанада лифтіде зардап шеккен баланың анасы: «Балам қант диабетімен ауыратын еді»

    Астанада лифтіде зардап шеккен баланың анасы: «Балам қант диабетімен ауыратын еді»

    Астанада лифтіде зардап шеккен баланың анасы оқиғаның егжей-тегжейін айтып, кінәліні қатаң жазалауды өтінді, — деп хабарлады Tengrinews.kz сайты. 

    Зардап шеккен Батыр есімді бала дүкеннен үйіне қайтып келе жатқан. Анасы баласын дүкенге картоп әкелуге жұмсаған екен.

    «Өзім кішкентай баламен үйде болдым. Терезеден қарап тұрдым, Батыр үйдің қоңырауын басты. Оған қол бұлғадым. Ал жасөспірім есіктің жанында тұрып, басқа қызға тиіскен екен. Батыр есікті ашқанда, онымен бірге кіреберіске, кейін лифтке жүгіріп кірген. Бұны видеодан көрсе болады», – дейді баланың анасы.

    Әйелдің қансыраған баласы үйге өзі жетіп, кіреберісте құлап қалған. Ол 1-қабаттан 4-қабатқа дейін қансыраған күйде жеткен.

    «Ол үйге кіріп, «мен өліп бара жатырмын, мені өлтірді» деді де жерге құлады. Оның бетінен қан атқылап жатты, бәрі қанға боялды. Шошып кеттім. Көршілерге қоңырау шалдым, ал олар дәрігерлерге хабарласты. Бақытымызға орай, көршіміз Жандос хирург еді, қан кеткенін тоқтатуға көмектесті, әйтпесе ұлым одан да көп қан жоғалтар еді. Содан кейін оны жедел жәрдеммен ауруханаға алып кетті», – дейді әйел.

    Батырдың анасы баласы басқа баламен күрекке таласып қалған болар деп ойлаған. Видеоны кейінірек көріпті. Зардап шеккен баланың анасының айтуынша, дәрігерлер ауруханада Батырдың бетін тіккен.

    «Ауруханада бізге жүйкесі мен артериясы зақымдалғанын айтты. Түнде оның жағдайы ауыр болды. Бізді кіргізбеді. Енді палатаға ауыстырды, есін жиды. Оның сол жақ беті жұмыс істемейді, беті ісінген, оған қоса қант диабеті диагнозы қойылған еді, 1-түрі, оның қашан қалпына келетінін білмеймін», – дейді Батырдың анасы.

    Әйел бұл жасөспірімді бұрын-соңды көрмегенін айтты. Зардап шеккен баланың анасы жасөспірімге ең қатаң жазаны талап етіп отыр.