Алматы және Түркістан облыстарында зергерлік бұйымдарды кепілге алып, заңсыз несие берумен айналысқан «Альби» ломбардтар желісінің қызметі тоқтатылды. Тергеу мәліметінше, бұл қызметтен түскен қылмыстық табыс 146 миллион теңгеден асқан, деп хабарлайды SONA.KZ Қазақстанның Қаржылық мониторинг агенттігіне сілтеме жасап.
Агенттік мәліметінше, бұған дейін «Альби-Ломбард» ЖШС микроқаржылық қызметпен айналысатын ұйымдардың тізілімінен шығарылған. Соның нәтижесінде компания ломбард қызметін көрсету құқығынан айырылған.
Алайда ұйым жұмысын тоқтатпаған. Атауын «Альби-КМ» ЖШС деп өзгертіп, алтын және басқа да зергерлік бұйымдарды кепілге алу арқылы қарыз беруді жалғастырған.
Заңдағы шекті мөлшерден алты есе жоғары пайыз
Тергеу дерегінше, ломбард бөлімшелері көбіне базарлар мен сауда үйлерінің маңында орналасқан.
Клиенттерді тарту үшін кепілге қойылған бұйымдарды жоғары бағалау және қарыздың несие тарихына әсер етпеуі туралы жарнамалар пайдаланылған.
Ал қарыздар күніне 2 пайыздық мөлшерлемемен берілген.
Қаржылық мониторинг агенттігінің хабарлауынша, бұл заңда белгіленген 0,3 пайыздық шекті мөлшерден алты еседен астам жоғары.
Қарыз шарттары бұрынғы «Альби-Ломбард» компаниясының мөрлері басылған кепіл билеттері арқылы рәсімделген.
Ақша қолма-қол беріліп, сондай-ақ бақылаудағы жеке кәсіпкерлердің банк шоттары арқылы аударылған.
Тергеу нұсқасы бойынша, заңсыз қызметтен түскен табыс 146 миллион теңгеден асқан.
21 пәтер мен қонақүйге тыйым салынды
Қылмыстық іс аясында сот күдіктінің мүлкіне тыйым салуға санкция берген.
Олардың қатарында:
* 21 пәтер;
* 5 жер учаскесі;
* 7 автокөлік;
* 7 гараж;
* 2 дүкен;
* 1 қонақүй бар.
Күдіктіге қатысты ешқайда кетпеу және тиісті мінез-құлық туралы қолхат түріндегі бұлтартпау шарасы таңдалған.
Қылмыстық іс сотқа жолданды.
Қаржылық мониторинг агенттігі Қылмыстық-процестік кодекстің 201-бабына сәйкес тергеудің өзге мәліметтері жария етілмейтінін хабарлады.
Күдіктінің кінәсі сот шешімімен анықталады.
