Алматыда 500-ге жуық ұрланған көліктерді иелері де танымайтындай етіп өзгертумен айналысқан заңсыз цехтің қалай ашылғаны мәлім болды. Алматы полициясының қызметкері – Қызылорда облысы Жаңақорған ауданының тумасы, 1984 жылы туылған Жұмаділ Қабылбаев қолды болған бір көліктің ізіне түскен кезде заманауи құрал-жабдықтарға ие бүтін бір ұйымдасқан қылмыстық топтың ізін кесемін деп ойлаған да жоқ еді.
Бұл оқиған бұдан үш жыл бұрын, 2022 жылы қазан айының 5 күні басталған-ды. Алматы қаласында Драйв такси қауіпсіздік қызметінің өкілі Сергей Федорченко Алматы қаласы полициясына арызданады. Оның айтуы бойынша, таксистің бірі такси паркі меншігіндегі су жаңа Hyundai автокөлігін жоқ қылып жіберген.
Бұл істің артына түскен полиция қызметкері Жұмаділ Қабылбаев таксистің лудоманияға шалдыққанын, жүргізіп жүрген такси паркінің меншігіндегі Hyundai автокөлігін Қапшағайдағы казинолардың біріне ұтылғанын анықтайды.
Десе де, казино такси паркінің көлігін алғанын мойындамай, қайда жібергенін де жасырған. Су жаңа көлік құмға сіңген судай жоғалған. Казиноға кірген ізі бар да, шыққан ізі жоқ. Бұл істі қалай болса да, соңына дейін жеткізуге полиция қызметкері Жұмаділ Қабылбаев бекем бел буады.
«Өз ақпарат арналарын қостым, тізбесін анықтадым. Бұл көліктің шанағындағы нөмірін ойып тастап, басқа нөмір жазып, қайта сататын цехті таптық. Біз іздеген көліктің нөмірін өзгертуге енді кірісіп жатқанда үстінен түстік», – дейді ол.
Түнгі сағат үште көліктің заңсыз цехқа кіргені туралы хабар түседі. Дереу жетіп, цехтағылардың бәрін қолға түсіріп, полиция бөліміне жеткізеді. «Біз барған кезде көліктің орындықтарын алып тастап, бояуын кетіріп, шанақтағы нөмірін өзгертуге әзірлеп жатқан. Сәл кідірсек, оның біз іздеп жүрген көлік екенін дәлелдей алмай қалатын едік», – дейді Жұмаділ Қабылбаев.
Осы қылмыс ашылған соң, бұл цехта бес жүзге тарта қолды болған көліктің нөмірі өзгергені анықталған. Ұрланған көліктердің құжаттары, мемлекеттік нөмірлері және басқа да айғақтар табылды. Бұлтартпас айғақтармен ұсталған соң, қылмыстық топ кінәларын мойындауға мәжбүр болды. Іс сотқа жолданды.
Бұл цех банктен залогқа, лизингке алған жаңа көліктерді кіргізіп, бір түннің ішінде басқа көлік етіп шығарумен айналысыпты. Техникалық құжаттары, көлік шанағының нөмірін өзгертеді. Лазермен қайта жазып шығатын аппараттары болған. Заңсыз цехтың «жұмысының» сапасына сарапшылардың өзі қатты таңырқаған.
«Зейін қойып, жұмыс істесең, кез келген қылмыс ашылады. Әйтпесе, бұл да – ізі жоқ, ашылуы қиын қылмыстың бірі», – дейді Жұмаділ Қабылбаев. Такси паркінің қызметкері Сергей Федорченко полицияның ілкімді әрекетінің арқасында мүліктердің иесіне қайтқанын алға тартып отыр.
«Әрине, бұл істің ашылуына Жұмаділ Қабылбаевтың кәсібилігі тікелей ықпал етті. Әйтпесе, бұл ұйымдасқан қылмыстық топ өте әккі. Ізін жасырып үлгерген. Өз ісіне адал, білікті полиция қызметкерінің арқасында ғана біздің ғана мүлік қана емес, жүздеген адамның көлігі иесіне қайтты. Рахметтен басқа айтарым жоқ. Жұмаділ Қабылбаевтай азаматтар полицияның беделін көтереді деп нық сеніммен айта аламын», – дейді Сергей Федорченко.
Алматы қаласында мүлігін, ақшасын жоғалтқан адамдардың қарасы көп. Бірде ұрлықты әккі қылмыскер жасаса, бірде қолының сұғы бар жолаушы жасайды. Жасыратыны жоқ, Алматыдай алып шаһарда мұндай ұсақ-түйек істерді ашу, ұрыны ұстап, мүлікті иесіне қайтарып беру оңай шаруа емес. Әсіресе, куәгерлерсіз, айғақтарсыз кездейсоқ қылмыстарды. Десе де, бұл – Жұмаділ Қабылбаевтың және кәсіби полиция қызметкерлерінің күнделікті жұмысы ғана.
