Ақ үй АҚШ президенті Дональд Трамп пен оның әкімшілігінің қызметіне арналған TRUMP TV: The Essentials Station атты тәулік бойғы стриминг арнасын іске қосты. Трансляция Ақ үйдің ресми платформаларында 24 сағат бойы жүргізіледі, деп хабарлайды Sona.kz Reuter-ге сілтеме жасап.
Эфирде Трамптың сөйлеген сөздері, әкімшілік өткізетін іс-шаралар, мұрағат видеолары және президенттік кезеңнің маңызды сәттері көрсетіледі. Ақ үй бұл арнаны әкімшілік қызметін дәстүрлі телеарналардың қатысуынсыз тікелей көрсетуге арналған алаң ретінде ұсынып отыр.
Жаңа арна әкімшілік пен бірқатар америкалық БАҚ арасындағы қарым-қатынас шиеленіскен тұста іске қосылды.
18 қыркүйекте Трамп CNN, MS NOW және Politico журналистеріне Ақ үй аумағына кіруге тыйым салынатынын мәлімдеді. Президент бұл редакцияларды өзі «жалған жаңалық» деп атаған материалдарды таратты деп айыптады. Кейін Ақ үй Бірінші түзету БАҚ-тың ақпарат жариялау құқығын қорғайтынын, алайда әкімшілік пікірінше, бұл ереже журналистерге Ақ үйге тұрақты кіруге немесе президенттік пулға міндетті түрде қатысуға кепілдік бермейтінін мәлімдеді.
CNN президент іс-шараларын кезекпен түсіріп, бейнематериалды басқа редакцияларға тарататын бес ірі телеарнадан құралған телевизиялық пулға кіреді. 21 қыркүйекте Ақ үй CNN-ге кезекті түсірілімін жүргізуге мүмкіндік бермеген соң, ABC, CBS, NBC және Fox News оны алмастыратын басқа арнаны шығарудан бас тартты. Соның салдарынан президент іс-шараларын ортақ телевизиялық түсіру уақытша тоқтады.
Мұның салдары сол күні-ақ байқалды. Ақ үй жанындағы жаңа тікұшақ алаңын ашу рәсімін ірі телеарналар түсірмеді. Ал әкімшіліктің өз трансляциясында тікұшақтың қатты шуынан Трамптың айтқан сөздері анық естілмеді.
CNN, MS NOW және Politico әкімшілікке қарсы бірлескен талап-арыз берді. Олар журналистерінің Ақ үйге кіру құқығын қалпына келтіруді талап етіп, жарияланған материалдардың мазмұнына байланысты енгізілген шектеу АҚШ Конституциясының Бірінші түзетуінде бекітілген сөз және баспасөз бостандығына қайшы деп санайды. Ақ үй бұл пікірмен келіспейді.
