Петропавлда отбасының жаппай улануына қатысты іс бойынша 26 жастағы медбике екі жылға бас бостандығынан айырылды.
Қайғылы жағдай былтыр маусымда Қызылжар ауданына қарасты Надежка ауылында болды. Дүкеннен сатып алынған бекон мен тұшпараны жеген отбасы уланды. Үш және алты жастағы екі бала көз жұмды.
Анасы Галина Коваленконың айтуынша, оларды құтқаруға алғашқы келген медбике тек көмір беріп кетіп қалған, жедел жәрдем де шақырмаған. Балаларға дер кезінде медициналық көмек көрсетілмеген.
Сот медбикені Қылмыстық кодекстің 317-бабы 4-бөлігі («Медициналық міндеттерді тиісті деңгейде орындамау») бойынша кінәлі деп таныды. Ол үш жылға медицина саласында жұмыс істеу құқығынан айырылып, минималды қауіпсіздік мекемесінде жазасын өтейді.
Моральдық зиян үшін талап етілген 50 млн теңгенің орнына Кызылжар аудандық ауруханасынан 10 млн теңге өндірілді.
Жәбірленуші тарап үкімге наразы және оны апелляцияға бермек.
Сот үкімі заңды күшіне енген жоқ.
