Шымкент қаласының Полиция департаменті кәмелетке толмаған қыздың бірнеше жыл бойы туған әкесінен зорлық көргені туралы ақпаратты растады, деп хабарлайды Sona.kz Azattyq Rýhy-на сілтеме жасап.
Полицияның мәліметінше, арыз түскен бойда қылмыстық іс тіркеліп, күдікті қолға түсті.
«Шымкент полициясы кәмелетке толмаған қызға қатысты зорлау дерегі бойынша қылмыстық істі тіркеді. Күдікті тұлға дереу ұсталып, сот қаулысы негізінде қамауға алынды», – делінген ведомствоның ресми жауабында.
Қазіргі уақытта тергеу жалғасып жатыр. Тәртіп сақшылары арызданушы мен жәбірленушінің уәждеріне сәйкес дәлелдер жинауда.
Полиция қыз баланы әкесінің інісі де зорлағаны және оның түсік жасағаны туралы ақпараттың шындыққа жанаспайтынын хабарлады.
«Жәбірленушінің жауабына сәйкес, оған қатысты өзге тұлғалардың заңсыз іс-әрекеттері расталмады. Жүктілік пен жасанды түсік тастау туралы мәлімет шындыққа сәйкес келмейді», – деп мәлімдеді ПД.
Тергеу қорытындылары бойынша қосымша ақпарат қылмыстық іс жүргізу нормаларына сәйкес ұсынылады.
