Шымкентте заңсыз онлайн-казинолардың айналымы 3,1 млрд теңгеге жеткен
Шымкентте Bingo-37 және Lotoboom платформалары арқылы заңсыз құмар ойын ұйымдастырған екі адам төрт жылға бас бостандығынан айырылды. Екі онлайн-казиноның жалпы ақша айналымы 3,1 миллиард теңгені құраған.
Бұл туралы Қазақстанның Қаржылық мониторинг агенттігі хабарлады.
Іс материалдарына сәйкес, ұйымдастырушылар клиенттерді WhatsApp мессенджері арқылы тартқан. Олар азаматтарға құмар ойындарға қатысу туралы хабарламалар жіберіп отырған.
Ойынға келісім берген адамдарға арнайы аккаунт ашылып, логин мен құпиясөз ұсынылған. Сондай-ақ ақша аударуға арналған банк шоттарының деректемелері берілген.
Ойыншылардан ақша қабылдау және ұтыстарды төлеу үшін 14 дроппердің атына ашылған банк шоттары пайдаланылған.
Қаржылық мониторинг агенттігінің мәліметінше, екі заңсыз ойын платформасының жалпы айналымы 3,1 миллиард теңгеге жеткен.
Қылмыстық жолмен алынған табысқа ұйымдастырушылар құны 200 миллион теңгеден асатын мүлік сатып алған.
Олардың қатарында BYD Destroyer, LiXiang L6 Max, Chevrolet Monza және SsangYong Rexton автокөліктері, сондай-ақ екі жер телімі бар.
Сот екі адамды кінәлі деп танып, әрқайсысын төрт жылға бас бостандығынан айырды.
Заңсыз табысқа сатып алынған автокөліктер мен жер телімдері сот үкімімен мемлекет кірісіне тәркіленді.
Сот үкімі әлі заңды күшіне енген жоқ.
