Sona.kz

Метка: Қонаев

  • Солтүстік жағалауда сенбілік өтті: 95 қап қоқыс жиналды

    Солтүстік жағалауда сенбілік өтті: 95 қап қоқыс жиналды

    Қонаев қаласында 5 маусым – Дүниежүзілік қоршаған ортаны қорғау күніне орай және «Таза Қазақстан» экологиялық акциясы аясында кезекті сенбілік ұйымдастырылды.

    Бұл жолы тазалық жұмыстары солтүстік жағалауға апаратын жол бойы мен «Күншуақ» жазғы лагері аумағында өтті. Шараға 70-ке жуық қала тұрғыны мен мекеме өкілі қатысып, барлығы 95 қап қоқыс жиналды.

    Жалпы, жыл басынан бері Қонаев қаласында өткен сенбіліктерге 2000-нан астам адам қатысқан. Нәтижесінде 62 тоннадан астам тұрмыстық қалдық жиналып, 16 техника жұмылдырылған.

    Қалалық әкімдік тұрғындарды табиғатты аялауға, қоршаған ортаны таза ұстауға және мұндай игі бастамаларға белсенді атсалысуға шақырады.

  • Қала әкімі жағажайларды тексерді

    Қала әкімі жағажайларды тексерді

    ТЖБ мамандарының сөзінше, шомылу маусымы басталғалы мұнда кезекшілік пен патрульдеу ұйымдастырылған. Сондай-ақ 10-нан астам құтқарушы посттарда отыр.

    Бейнебақылау камералары арқылы полиция басқармасы бақылау жүргізуде. Әр жерлерде ақпараттық баннерлер орнатылған.

    Ал кәсіпкерлермен тілдескен шаһар басшысы халықтың қауіпсіздігін қамтамасыз ету, нысандарды санитарлық-эпидемиологиялық талаптарға сәйкестендіру – ең басты шаралар екенін атап өтті.

    «Келісімшарт жасалған соң, нысандарды талаптарға сай ете отырып, халыққа жоғары деңгейде қызмет көрсету қажет. Қайғылы жағдайлар орын алмас үшін бірлесе әрекет етейік. Жағажайды, бизнес орындарын таза ұстаңыздар. Халық пен қонақтар, демалушылар тарапынан түскен сын-пікірлерді басшылыққа алып, кемшілікті түзетіңіздер», – деді Асхат Бердіханов.

    Айта кетейік, биыл Қонаевта 140-тан астам демалыс орны жұмыс істейді. 6,7 жағажайларды абаттандыру шомылу маусымынан кейін басталады деп жоспарлануда.

  • Flyboard пен автошеру: Қонаев халқы мерекені ерекше форматта атап өтті

    Flyboard пен автошеру: Қонаев халқы мерекені ерекше форматта атап өтті

    Алматы облысының орталығында ұйымдастырылған думанды күн патриоттық рухты көтеріп, тұрғындарға жағымды көңіл-күй сыйлады.

    Мереке орталық алаңнан басталған ретро-көліктер шеруімен ашылды. Мемлекеттік тулармен безендірілген көліктер қаланы аралап өтіп, №5 қалалық жағажайға дейін жетті.

    Жағажайда өткен Flyboard шоуы күннің ерекше сәтіне айналды. Спортшылар су бетінде көк Туды желбіретіп, әуеде көз тартарлық трюктер жасады. Бұл көріністі 300-ден астам қала тұрғыны мен қонақтары тамашалады.

    Іс-шара барысында қала әкімі Асхат Бердіханов тұрғындарды айтулы мерекемен құттықтады.

    «Сіздерді 4 маусым – Қазақстан Республикасының Мемлекеттік рәміздер күнімен шын жүректен құттықтаймын! Бұл – тәуелсіздігіміздің символы, ұлт бірлігі мен рухын айшықтайтын маңызды күн. Мемлекеттік рәміздер – баршамыз үшін ортақ мақтаныш, болашақ ұрпақ үшін асыл мұра. Баршаңызға денсаулық, береке және игілік тілеймін», – деді әкім.

    Қала тұрғындары ерекше форматта өткен шараларға жоғары баға берді.

    «Flyboard шоуын алғаш рет көріп отырмыз. Керемет әсер алдық. Ұйымдастырушыларға алғысымыз шексіз. Осындай көріністер Отанға деген сүйіспеншілікті арттыра түседі», – деді Димаш есімді тұрғын.

    Іс-шара мерекелік концертке ұласты.

  • Тәттілер мен сыйлықтар, демалыс пен ойын-сауық: Қонаев қаласында Халықаралық балаларды қорғау күні тойланды

    Шараға Қонаев қаласы әкімінің орынбасары Сәуле Нұрсолтанова қатысып, барлық бүлдіршіндерді мерекемен құттықтады.

    Мерекелік концертке өнер мектептері, балабақшалар мен түрлі шығармашылық орталықтардың тәрбиеленушілері қатысты. Көпшілік назарына би қойылымдары, әндер мен көркем композициялар ұсынылды. Ерекше балалар да сахна төрінен табылып, өнерлерін паш етті.

    Сондай-ақ орталық алаңда балалар шығармашылығынан көрме ұйымдастырылып, отбасылық ойындар ойнатылды, балмұздақтар таратылды. Бұдан бөлек, бүлдіршіндер ретро-көліктерге отырып, қаланы аралап шықты.

    Жалпы Қонаев қаласында мереке кең көлемде аталып өтті:

    ✔️ Оқушылар «Қазақстан балалары» онкүндігі аясында түрлі шараларға қатысты
    ✔️ 30 мамыр күні 80 ерекше балаға арналған салтанатты шара өтті. Оларға сыйлықтар таратылып, түрлі қызықты ойындар ұйымдастырылды
    ✔️ мүгедектігі бар, көпбалалы және әлеуметтік осал топтан шыққан 490 баланы бассейндерге, ойын-сауық орталықтарына демалысқа апару жоспарланып отыр.

    Бұл шаралар әкімдікпен қатар, Отбасын қолдау орталығы, қаладағы қоғамдық бірлестіктермен бірге ұйымдастырылды.

  • Қонаевта дезинсекцияның ІІ кезеңі өтті: маса мен шіркейге қарсы күрес жалғасуда

    Қонаевта дезинсекцияның ІІ кезеңі өтті: маса мен шіркейге қарсы күрес жалғасуда

    Дезинсекцияның ІІ кезеңі 29 мамыр мен 1 маусым аралығында жүзеге асырылды. Өңдеу жұмыстары кешкі сағат 23:00-ден таңғы 06:00-ге дейін жүргізілді. Бұл ретте рұқсат етілген, санитарлық талаптарға сай инсектицидтік құралдар қолданылады. Атап айтқанда, «Бактицид», «Ультрагран», «Циперметрин» сынды арнайы препараттар зиянкес жәндіктерге қарсы тиімді әсер етеді.

    Өңдеу жұмыстарына арнайы техника мен дрондар жұмылдырылып, жеке қорғаныс құралдарымен жабдықталған мамандар тартылған.

    Айта кетейік, бұл бағыттағы шаралар кезең-кезеңімен жаз бойы жалғасып, тамыз айына дейін жүргізіледі. Қала әкімдігі тұрғындарды өңдеу жұмыстары кезінде қауіпсіздік шараларын сақтауға шақырады.

  • Қонаевта Мәдениет және өнер қызметкерлері күні аталып өтті

    Қонаевта Мәдениет және өнер қызметкерлері күні аталып өтті

    Мерекелік шара барысында сахна саңлақтары құрметке бөленді, концерт қойылып, қазақтың салт-дәстүрінен сыр шертетін көрме және ұлттық нақыштағы киім үлгілерінің топтамасы халыққа ұсынылды.

    Мәдениеттің дамуына үлес қосып жүрген азаматтарды қала әкімі Асхат Бердіханов құттықтады.

    «Бұл күн – ұлттың өнері мен мәдениетін дамытуға күш салып жүрген сіздерге деген зор алғыс пен құрметтің белгісі. Қонаев қаласы – көне тарих пен жаңғыру тоғысқан ерекше мекен. Соңғы жылдары қаламызда мәдениет саласы жақсы дамып келеді», — деді әкім.

    Сондай-ақ ол сала жаңалықтарымен де бөлісті.

    «Түрлі байқаулар мен мерекелер, мәдени мекемелердің белсенді жұмысы – сіздердің қажырлы еңбектеріңіздің жемісі. Биыл орталық кітапхана ғимараты күрделі жөндеуден өтіп, пайдалануға берілді. Жақын күндері қалалық мәдениет үйінде де ағымдағы жөндеу жұмысы басталады. Қала бойынша кітап қоры көбейіп, оқырмандар саны да артуда. Осы мерекеде баршаңызға зор денсаулық, шабыт пен табыс, отбасыларыңызға амандық тілеймін!» — деді Асхат Бердіханов.

    Шараның ресми бөлімінде бірқатар маманға қала әкімінің Алғыс хаты табысталды.

  • 8 млрд. теңге инвестиция, Қытайға экспорт: Қонаевта жаңа зауыт салынуда

    8 млрд. теңге инвестиция, Қытайға экспорт: Қонаевта жаңа зауыт салынуда

    Мұндағы ескі станоктар түгелдей ауыстырылып, үш түрлі зауыт салынып жатыр. Оның бірі сұйық май шығаратын болса, келесілері жемдік ұн мен ұн өндіретін зауыт.

    Дайын өнім Қазақстанның нарығында саудаланып қана қоймай, Қытайға экспортталады. Тартылған инвестицияның көлемі 8 млрд. теңгені құрап отыр.

    «Бүгінде теміржол ауыстырылып, контейнер терминалы, қоймалар, зауыттар салынып жатыр. Құрылысқа 200-ге жуық адам тартылған. Сондай-ақ 2 гектар жер қосымша сатып алынды. Жобасы жасалуда. Зауыт биыл қолданысқа беріледі. Жылына 1 000 000 тонна өнім экспортқа шығарылады деп жоспарлап отырмыз», — деді ЖШС бас директорының орынбасары Ринат Тоқпанов.

    Зауыт керекті материалдармен өзін-өзі қамти алады. 2-3-қабаттарда қап шығаратын станоктар қойылған. Қазір бұл жерде 250 адам еңбек етіп жатса, қосымша 300 жұмыс орны құрылады.

    Айта кетейік, Қонаев қаласының инвестициялық пулына 39 жоба енгізілген. Инвестицияның жалпы көлемі 2,4 трлн.теңгені құрайды. Нәтижесінде 17 000 тұрақты жұмыс орны пайда болады. Қазір шаһарда 12 түрлі өндіріс ошағы қызмет етеді.

  • Қонаевта 30 жыл асфальт көрмеген жолдар бар

    Қонаевта 30 жыл асфальт көрмеген жолдар бар

    Қонаев қаласының Кешенді даму жоспары аясында Шеңгелді ауылдық округіне қарасты Сарыбұлақ, Ақөзек және Қосқұдық ауылдарында жол жөнделіп жатыр. Бұл туралы қалалық жолаушылар тасымалы және автомобиль жолдары бөлімінің басшысы Бағдат Алиев хабарлады.

    Мекеме басшысының айтуынша, Қосқұдық ауылында ұзындығы 8,5 шақырым болатын 8 көше, Сарыбұлақта 14 көшенің 7,7 шақырымы, ал Ақөзекте 6 көшенің 3,9 шақырым жолы орташа жөндеуден өтуде. Барлық учаскелерде жолдың ені 6 метр болып, бір қабат асфальт төселеді. Қазіргі таңда қиыршық тас төсеу, тегістеу жұмыстары аяқталуға жақын.

    «Жөндеу жұмыстары бекітілген кестеге сай жүргізілуде. Жол құрылысы қыркүйек айына дейін аяқталады деп жоспарланған. Сонымен қатар биыл Кербұлақ ауылындағы жолдар да орташа жөндеуден өтеді», – деді Бағдат Алиев.

    Оның айтуынша, Кешенді даму жоспары аясында жалпы 19 жоба қарастырылған. Қазіргі уақытта бірқатар жобаның сметалық құжаттамасы әзірленіп, мемлекеттік сараптамаға ұсынылуда.

    Сондай-ақ қаланың өзінде жол инфрақұрылымын жақсарту мақсатында ағымдағы жөндеу, шұңқырларды жамау, жол белгілерін және жасанды жол дөңестерін орнату, жолақтар сызу жұмыстары жүргізілуде. Бұл жұмыстар шілде айының соңына дейін аяқталады деп жоспарланған.

  • Энергетиктер отбасы: Қонаев тұрғыны салада 30 жыл қызмет етеді

    Энергетиктер отбасы: Қонаев тұрғыны салада 30 жыл қызмет етеді

    Ол осы салада 27 жыл қызмет етіп келеді. 1998 жылы Алматы энергетика және байланыс университетін тәмамдаған ол өмірін толықтай осы салаға арнаған.

    «Энергетика – біздің отбасының өмір жолына айналды. Жұбайым да – осы саланың маманы. Кенже ұлым да болашағын энергетикамен байланыстырды. Осылайша, біздің отбасымыз «энергетиктер әулеті» болып шыға келді», – дейді Айбол.

    Оның күнделікті міндеті — қосалқы станциядағы құрылғылардың жұмысын бақылау, апатты жағдай орын алған сәтте тиісті қызметтерге шұғыл хабар беру, әрі қарай нұсқаулыққа сәйкес әрекет ету. Қауіп пен жауапкершілік қатар жүретін салада мұқияттылық пен кәсібилік аса маңызды.

    Айбол Көпеков заманауи технологиялардың артықшылығын жоққа шығармайды. Соңғы бес жылда жүйе автоматтандырылып, құрылғылар жаңартылған. Алайда, бұл адам жауапкершілігін азайтпайды, керісінше, жаңашылдыққа тез бейімделуді, білім мен тәжірибені ұштастыруды талап етеді.

    Ол – жас мамандарға жол көрсетіп, тәжірибесін аямай бөлісіп жүрген тәлімгер.

    «Жастар келеді, үйренеді, өз орындарын табады. Ал мен үшін халыққа қызмет ету – үлкен абырой әрі мәртебе», – дейді маман.

    Ел Президенті 2025 жылды «Жұмысшы мамандықтар жылы» деп жариялағаны бекер емес. Себебі дәл осындай адамдар – елдің іргесін бекемдеп тұрған еңбек иелері. Айбол сынды қарапайым жандардың күнделікті елеусіз еңбегі ел тіршілігінің басты тетігіне айналған.

  • Қонаев әкімдігі халық санының күрт азаюын түсіндірді

    Қонаев әкімдігі халық санының күрт азаюын түсіндірді

    Осыған байланысты Қонаев қаласының әкімдігі мәлімдеме жасады.

    «Баршаға мәлім, 2024 жылдың 9 қаңтарында Алатау қаласы құрылды. Оған Қонаев қаласы аумағындағы Заречный, Арна ауылдары толығымен енгізілді. Сәйкесінше, қала халқының саны азайды. 2023 жылы Қонаев тұрғындарының саны 70512 болса, 2024 жылы бұл көрсеткіш 65024-ке төмендеген. Алайда, халық саны қайта өсіп келе жатыр, қазіргі көрсеткіш 65934-ті құрап отыр. Осы себептен, халық арасында «Облыс орталығы өмір сүруге қолайсыз қала» деген жаңсақ пікір тудырмауларыңызды сұраймыз», — деп жазды әкімдік.

    Тұрғындар не дейді?

    Қалалық қоғамдық кеңес төрағасы Сергей Горяной шаһарға облыс орталығы болғалы жан біткенін айтады.

    «Қонаевта күнделікті мәдени, спорттық шаралар өтіп жатыр. Оның ішінде жазғы және қыстық дрифт шоу, Оушенмэн, түрлі марафондар, жарыстар бар. Осының өзі-ақ қалаға жан біткенін көрсетеді. Тұрғындардың демалуына қолайлы орта жасалып, денешынықтырушылардың саны артқан. Оның дәлелі — Кроссфит алаңы мен жаңа жағажайлар. Шомылу маусымына дайындық қызу жүріп жатыр. Инвестициялық жобалар да жүзеге асуда. Тұрғын үйлердің құрылысы қарқын алды. Тізбектеп айта берсек, көп әрине. Халық саны азайды деп айта салу – оңай. Ел ішінде не болып жатқанына аса мән беру қажет», – деді ол.

    Тағы бір пікірмен «PARYZ ЕРІКТІЛЕРІ» жастар қоғамдық бірлестігінің төрағасы Әділет Айтқазы бөлісті. Жас маманның сөзінше, қала халқының бірлігі бекем, тіршілігі таудай.

    «Қонаев қаласының тұрғындары әрқашан бірлесе қызмет етеді. Оны азаматтық ұстанымдарынан аңғаруға болады. Қаладағы мәселелерді көтеріп, оның шешілуіне бір кісідей атсалысады. Халық саны маңызды шығар, алайда, оның күнделікті тіршілігі одан да маңыздырақ. Бас жоспар бойынша тұрғындар саны 200 мың болады деп жоспарланған. Қазірдің өзінде 65 мыңнан асып тұрсақ, бұл межеге тез арада жетеміз. Жоспарда анықталғандай, «Жаңа Іле» аумағы игеріліп, Академиялық қалашық салынса, қоныстанушылардың саны артып, шаһар дамиды. Қазірдің өзінде даму қарқыны жаман емес», — деді Әділет Айтқазы.

    Айта кетейік, жалған ақпарат таратып, әлеуметтік шиеленіс тудырғаны үшін ҚР заңнамалары шеңберінде жауапкершілік қарастырылған.